Almatydaǵy turǵyn úı keshenderiniń birinde lıft isten shyǵyp, bir adam zardap shekti
2022 jylǵy 30 maýsym 14:08

Almatydaǵy turǵyn úı keshenderiniń birinde lıft isten shyǵyp, bir adam zardap shekti

ALMATY. QazAqparat – Almatyda «Mega Towers» turǵyn úı keshenindegi lıft 25-qabatqa deıin bar jyldamdyqpen kóterilip, úıdiń tóbesine soǵyldy. Saldarynan jas jigit zardap shekti, dep habarlaıdy QazAqparat tilshisi.

Onyń vıdeosy áleýmettik jelilerde tarady . Belgili bolǵandaı, oqys oqıǵa 29 maýsym kúni bolǵan.

«Mega Towers turǵyn úı keshenindegi lıft 25-qabatqa soǵyldy. Otbasymyzben osy turǵyn úı kesheninde 4-qabattan lıftpen tústik. 1-qabatqa túskende mennen basqasynyń bári shyqty. Esikter jabylmastan, lıft jyldam joǵary kóterile bastady. Joǵaryda bireý shaqyryp, esikti jappaǵan shyǵar dep oıladym. Ol 7-qabatqa kóterilip, odan ári 25-qabatqa deıin jyldamdyǵy arta tústi», - dep jazdy vıdeo avtory.

Beınejazbadan er adamnyń qolyn jaraqattap alǵanyn kórýge bolady.

Almaty ákimdigi oqıǵany rastady.

«Almaty qalasynyń Kommýnaldyq ınfraqurylymdy damytý basqarmasy men lıft jabdyqtaryn basqarý bóliminiń mamandary atalǵan mekenjaıǵa baryp, lıftke vızýaldy tekserý júrgizdi. Oqıǵanyń sebepteri naqtylanyp jatyr. Onyń nátıjeleri boıynsha tıisti sharalar qabyldanatyn bolady», - dep habarlady ákimdiktegiler.


Uqsas jańalyqtar

Jańalyqtar

Úrdis

MURAǴAT