Jańalyqtar  >
  Almaty
Almatydaǵy skverlerdi abattandyrýda olqylyqtar anyqtaldy
2022 jylǵy 12 tamyz 17:13

Almatydaǵy skverlerdi abattandyrýda olqylyqtar anyqtaldy

ALMATY. QazAqparat – Almatyda birneshe skver abattandyrylyp jatyr. Nysandardy aralap shyqqan qala ákiminiń orynbasary Asqar Amrın tıisti sala basshylaryna eskertý jasady, dep habarlaıdy QazAqparat atqarýshy organnyń baspasóz qyzmetine silteme jasap.

Birinshi nysan – Oqýshylar saraıynyń mańyndaǵy skver. Aýdany 5 ga bul aýmaqty abattandyrý jobasy 2021 jyly bekitilgen. Jaryqtandyrý júıesi, balalar alańy, oryndyqtar men qoqys jáshikterin ornatý, sýarý júıesin qalpyna keltirý, kógaldandyrý – 147 japyraqty jáne qylqanjapyraqty aǵash otyrǵyzý josparlanǵan. Qazir mundaǵy demontaj jumystary 40% atqaryldy. Jańa sýarý júıesiniń transheıasy qazylǵan. Tekserý barysynda Asqar Amrın aǵashtardyń tamyry zaqymdanǵanyna mán berip, jumys tehnologııasyn jasyl jelekke zııan tıgizbeıtindeı etip, qatań baqylaýdy kúsheıtýdi tapsyrdy. Skverdiń tarıhı kelbetin saqtaý qajettigine basa nazar aýdardy. Qarqyndy kúsheıtý úshin qosymsha jumys kúshin tartyp, qyrkúıekte aıaqtaýdy tapsyrdy.

Kelesi nysan – Memlekettik murajaı aldyndaǵy skver. Munda jaryqtandyrý júıesi ornatylǵan, sýburqaq túbi betondalyp, sýarý júıesiniń qubyrlary salynǵan. Endi kishi arhıtektýralyq pishinderdi ornatyp, kógaldandyrý jumystaryn júrgizý josparlanǵan.

Sondaı-aq, Baıseıitova kóshesiniń Jambyl kóshesinen Sátbaev kóshesine deıingi bóligin abattandyrý jumystary da júrip jatyr. Atalǵan aýmaqta jaryq júıesi ornatylyp, kespetastar tóselgen, sýarý júıesiniń qubyrlary tartylǵan. Jumystardy qazan aıynyń sońynda aıaqtaý josparlanǵan.

Al, Álııa men Mánshúk atyndaǵy skverdi abattandyrý jobasy boıynsha mundaǵy shirigen aǵashtar kesiledi. Asqar Amrın keser aldynda mamandardy shaqyryp, jasyl jelekti tolyq tekseristen ótkizýdi tapsyrdy.

Sonymen qatar, qala ákiminiń orynbasary abattandyrý jumystary júrgizilip jatqan Qazaq-Brıtan tehnıkalyq ýnıversıteti janyndaǵy Soltústik skverinde bolyp, merdiger kompanııa ókilderine jumys sapasyna qatysty birqatar eskertý jasady. Jumys qarqynyn kúsheıtýdi tapsyrdy.

Jumys saparynyń qorytyndysy boıynsha Asqar Amrın ekologııa jáne qorshaǵan orta basqarmasyna eskertý jasap, qysqa merzimde barlyq olqylyqtardy retteýdi, skverlerdi 1 qarashaǵa deıin qoldanysqa berýdi tapsyrdy.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT