Almatydaǵy MÁMS júıesine 400 mlrd teńgege jýyq kiris tústi
2022 jylǵy 29 maýsym 14:45

Almatydaǵy MÁMS júıesine 400 mlrd teńgege jýyq kiris tústi

ALMATY. QazAqparat - Almatydaǵy mindetti áleýmettik medıtsınalyq saqtandyrý (MÁMS) júıesine jyl basynan beri 398 mlrd teńgeden astam qarjy tústi.

Bul týraly Almaty qalasy Áleýmettik medıtsınalyq saqtandyrý qorynyń dırektory Tileýhan Ábildaev óńirlik kommýnıkatsııalar qyzmetiniń brıfınginde málim etti, dep habarlaıdy QazAqparat tilshisi.

Spıkerdiń aıtýynsha, bıylǵy jyldyń 5 aıynda MÁMS júıesine túsimder 398,4 mlrd teńgeni qurady.

«Túsimderdiń negizgi úlesin 15 jeńildik sanaty úshin memlekettiń jarnalary quraıdy – 42%-dan astam, jumys berýshilerdiń aýdarymdary – 34,7%-dan astam, ekonomıkalyq belsendi halyqtyń jarnalary – 22,6%», - dedi Tileýhan Ábildaev.

Spıker MÁMS-tiń engizilýimen turǵyndar úshin konsýltatsııalyq-dıagnostıkalyq kómektiń qoljetimdiligi artqanyn atap ótti.

Ol sondaı-aq medıtsına uıymdary tarapynan quqyq buzylǵan jaǵdaıda kez kelgen qala turǵyny paıdalana alatyn keri baılanys arnalaryn atady.

«Atap aıtqanda, Qoldau24/7 mobıldi qosymshasy, 1406 biryńǵaı baılanys ortalyǵy jáne resmı saıt fms.kz. barlyq ótinishter mindetti túrde qarastyrylady», - dedi ol.

Almaty qalasy MÁMS qory dırektorynyń málimetinshe, qor 2017 jyldan bastap mindetti medıtsınalyq saqtandyrýǵa qarajat jınap keledi.

2018 jyldan bastap tegin medıtsınalyq kómektiń kepildik berilgen kólemi (TMKKK) sheńberinde, sondaı-aq, 2020 jyldyń 1 qańtarynan bastap – MÁMS júıesi aıasynda medıtsınalyq kómekti strategııalyq satyp alýshy bolyp tabylady.

Aıta keteıik, búgingi kúni MÁMS-ke óńirler boıynsha eń kóp kirister Almaty, Nur-Sultan qalalary men Qaraǵandy jáne Shyǵys Qazaqstan oblystaryna tıesili.


Uqsas jańalyqtar

Jańalyqtar

Úrdis

MURAǴAT