Almatydaǵy krematorııdiń ashylýy úshinshi ret keıinge shegerildi
ALMATY. QazAqparat – Almatydaǵy krematorııdi ashý jáne paıdalanýǵa berý shamamen 2023 jyldyń ekinshi toqsanyna shegerildi. Bul týraly qalalyq qurylys basqarmasy málim etti, dep habarlaıdy QazAqparat tilshisi.
Qurylys basqarmasynyń málimetinshe, TP-10/0,4 kV jáne gaz qubyrynyń trassasyn montajdaý jumystaryn qospaǵanda, ınjenerlik jelilerdi tóseý jumystary 80 paıyzǵa oryndalǵan.
«2021 jyldyń ekinshi toqsanynda baǵanyń serpindi ósýine baılanysty qurylys-montajdaý jumystaryn júrgizý kezeńine transformatorlyq qosalqy stantsııanyń smetalyq quny ózgerdi. Gaz qubyrynyń baǵyty men jalǵaý núktesi de aýystyryldy. Іshki memlekettik aýdıt komıtetine ótinish joldanyp, jobalyq-smetalyq qujattamany túzetýge kelisim alyndy. Jobalaý uıymy jobany túzetý jumystaryn júrgizdi. Qazirgi ýaqytta jergilikti bıýdjet komıssııasynyń hattamasy bekitildi. Jobalaýshylar qorytyndy alý úshin qujattamany saraptama portalyna júktedi. Saraptama qorytyndysy boljam boıynsha osy jyldyń naýryz aıynyń basynda shyǵady. Sodan keıin qurylys-montajdaý jumystary júrgiziledi. Osyǵan baılanysty nysandy ashyp, paıdalanýǵa berý keıinge shegerilip otyr. Boljammen 2023 jyldyń ekinshi toqsanynda ashylady», - dep habarlady qalalyq qurylys basqarmasynan.
Aıta keteıik, krematorııdiń qurylysy 2021 jyldyń qyrkúıeginde aıaqtalýy tıis edi. Keıin syrtqy ınjenerlik jelilerdi, onyń ishinde ornatylǵan peshterdi paıdalaný úshin gazben jabdyqtaý jelisin tartý jumystaryna oraı, 2022 jyldyń mamyryna jyljydy.
Byltyr qarasha aıynda Almaty qalalyq qurylys basqarmasy krematorııdiń 2023 jyldyń birinshi toqsanynda ashylatynyn málimdegen edi.
Eske salaıyq, 2020 jyldyń jazynda krematorıı qurylysynyń jobalyq-smetalyq qujattaryn jasaýǵa tender jarııalanǵan bolatyn. Qurylys quny – 1,3 mlrd teńge. Krematorııde eki peshi bar bir zal bolady.
Foto: reportplus.gr
