Almatydaǵy Baqorda bazary mańy taǵy órtendi
ALMATY. QazAqparat - Alataý aýdanyndaǵy «Baqorda» bazary mańynda kólik dóńgelekteri men qoqys órtendi, dep habarlaıdy QazAqparat tilshisi.
Onyń vıdeosy áleýmettik jelide tarady.
Almaty qalalyq Tótenshe jaǵdaılar departamentiniń málimetinshe, 4 shilde kúni saǵat 12:32-de 101 pýltine Alataý aýdany, Yrysty 46/2, mekenjaıynda órt shyqany týraly habar tústi.
«Oqıǵa ornyna jaqyn jerde kezekshilik atqarǵan órt sóndirý bólimsheleri sanaýly mınýtta jetti. Olar kólik dóńgelekteri men qoqystyń órtenip jatqanyn anyqtady. Qyzyl jalyn 35 sharshy metr jerdi sharpyǵan. Oqıǵa ornynda 1 avtotsısterna men 5 órt sóndirýshi jumys istedi», - dep atap ótti Almaty qalalyq TJD baspasóz qyzmeti.
Buǵan deıin «Baqorda» bazarynyń aýmaǵynda ornalasqan qurylys zattaryn satatyn saýda núktesi janǵany týraly jazǵan bolatynbyz.
