Almatyda jappaı ereýil kezinde elge qarý taratqandar ustaldy
2022 jylǵy 20 qańtar 13:23

Almatyda jappaı ereýil kezinde elge qarý taratqandar ustaldy

ALMATY. QazAqparat - Almatyda jappaı tártipsizdikke qatysýshylarǵa qarý taratqandar ustaldy. Bul 19-20 jas aralyǵyndaǵy jigitter bolyp shyqty, dep habarlaıdy QazAqparat tilshisi.

Jappaı ereýil kezinde kúdiktiler qarý-jaraq dúkeninen qarýlardy alyp shyǵyp, Respýblıka alańyna jınalǵandarǵa tarata bastaǵan.

Jedel is-shara barysynda krımınaldyq polıtsııa basqarmasynyń qyzmetkerleri kúdiktilerdiń jeke basyn anyqtady.

«Olar qaladaǵy bazarlardyń biriniń aýmaǵynda ustaldy. Qazirgi ýaqytta aıyptalýshylar qamaýda otyr. Olardyń basqa da qylmystarǵa qatysy bar-joǵyn mindetti túrde tekseremiz», – dedi Almaty qalalyq polıtsııa departamenti bastyǵynyń orynbasary Berik Ábilbekov.

Aıta keteıik, búlikshilerge qarý taratyp jatqan sát kýágerlerdiń kamerasyna túsken. Keıinnen bul vıdeo áleýmettik jelilerde tarady.

«Biz qarý-jaraq dúkenine shabýyl jasadyq. Bizdi osylaı jasaýǵa májbúrlegen bir top adam boldy. Sosyn biz urlaǵan qarý-jaraqtyń jartysyn ózderine alyp aldy, avtomattaryn silkip turdy. Men aq tústi Lexus kóligin júrgizdim», – dedi birinshi kúdikti.

«Bular - gaztumyldyryq kıgen, avtomat, pyshaqpen qarýlanǵan adamdar. Olar bizge qarýdy tez alyp shyǵyp, ony aparyp berýdi buıyrdy. Biz ony qoryqqannan istedik, bul adamdar bizge qysym kórsetti. Avtomat asynǵan adamdardan qalaı qoryqpaısyń», – deıdi ekinshisi.

Úshinshiniń aıtýynsha, qalany kólikpen aralap júrip, qarý-jaraq dúkenine barǵandarynda ony tonap jatqan.

Olardyń kólikterine qarý tıep, alańǵa alyp barý buıyrylǵan.

«Polıtsııa osy toptyń úılestirýshisiniń jeke basyn jáne ustalǵandardyń áreketiniń shynaıy sebebin anyqtaýǵa kiristi. Elimizdiń Qylmystyq kodeksiniń birden birneshe baby boıynsha sotqa deıingi tergeý amaldary júrgizilýde», - dedi polıtsııada.


Jańalyqtar

MURAǴAT