Almatyda urlanǵan qymbat kólik Jambyl oblysynan tabyldy

TARAZ. QazAqparat – Jambyldyq polıtseıler urlanǵan jol talǵamaıtyn qymbat kólikti ıesine qaıtardy, dep habarlaıdy QazAqparat tilshisi.

Jambyl oblystyq Polıtsııa departamentiniń baspasóz qyzmetinen málim etkendeı, Almaty qalasynda urlanǵan qymbat kólik Jambyl oblysynan tabyldy.

«Jambyl oblysynyń PD polıtseıleri respýblıkalyq mańyzy bar «Batys Eýropa-Batys Qytaı» avtojolynyń 345-shaqyrymynda Merki aýdanynyń 31 jastaǵy turǵynynyń basqarýyndaǵy «Land Rover Range Rover» markaly avtokóligin toqtatty. Tekserý barysynda júrgizýshiniń basqarýyndaǵy avtokóliktiń qujattary bolmaǵany anyqtaldy. Baǵdarlar aqparaty kóliktiń Almaty qalasynda urlanǵan kólik retinde tirkeýde turǵanyn kórsetti», - delingen vedomstvo habarlamasynda.

Atalǵan derek Almaty qalasynyń Áýezov aýdanynda urlyq oqıǵasy retinde tirkelip, QR QK-niń 188-baby 3-bóligi (urlyq) boıynsha sotqa deıingi tergeý bastalǵan.

Búginde ustalǵan azamat ta, urlanǵan avtokólik te tirkelgen aýmaǵy boıynsha Almaty qalasyna jetkizildi.