Almatyda UBT-nyń alǵashqy aptasynda 9 túlektiń nátıjesi joıyldy
2022 jylǵy 24 mamyr 17:19

Almatyda UBT-nyń alǵashqy aptasynda 9 túlektiń nátıjesi joıyldy

ALMATY. QazAqparat – Almatyda Ulttyq biryńǵaı testileý bastalǵan alǵashqy aptada ereje buzýdyń 9 faktisi anyqtalyp, test nátıjeleri joıyldy. Bul týraly brıfıng barysynda qalalyq Bilim sapasyn qamtamasyz etý departamentiniń basshysy Gúlnár Ermekbaeva málim etti, dep habarlaıdy QazAqparat tilshisi.

«Almatyda UBT bastalǵaly bir apta ishinde 1300-ge jýyq túlek test tapsyrdy. Megapolıstegi úsh testileý ortalyǵynda ereje buzýdyń 9 jaǵdaıy anyqtaldy. Olardyń bireýi test tapsyrmalaryn shyǵaryp, taratpaqshy bolǵan. Qalǵandary telefon arqyly qashyqtan jaýap alýǵa tyrysty. Báriniń nátıjesi joıyldy. Sonymen qatar olar endi ekinshi múmkindigin qoldana almaıdy», - dedi ol.

Spıkerdiń aıtýynsha, túlek birinshi testileýden sátti ótip, ekinshi múmkindikte belgili bir erejelerdi buzsa, onda eki testileýdiń de nátıjeleri joıylady jáne ol grant alý konkýrsyna qatysa almaıdy.

«Sondyqtan árbir talapkerdi akademııalyq adaldyqty saqtaýǵa shaqyramyz. Árbir ata-ana UBT-nyń ótý barysyn kóre alady. Barlyq beınejazba testileýden keıin tekseristen ótedi. Testileýge qatysýshy tártip buzǵan jaǵdaıda nátıjesi joıylady, grant ıegeri bolyp jatsa da, grantynan aıyrylady», – dedi Gúlnár Ermekbaeva.


Uqsas jańalyqtar
Avtor:
Tilshi

Jańalyqtar

MURAǴAT