Almatyda turǵyndarǵa qantty tómen baǵada
2022 jylǵy 12 tamyz 16:28

Almatyda turǵyndarǵa qantty tómen baǵada "satpaq" bolǵan alaıaqqa sot úkimi shyqty

ALMATY. QazAqparat - Almaty qalasynyń №2 Bostandyq aýdandyq soty turǵyndarǵa qantty tómen baǵamen satyp alýdy usynyp, aldap-soqqan adamǵa qatysty úkim shyǵardy. Onyń 3 jyl, 6 aıǵa bas bostandyǵy shekteldi, dep habarlaıdy QazAqparat tilshisi.

Aýdandyq sottyń baspasóz qyzmeti habarlaǵandaı, A. esimdi azamatqa Qylmystyq kodekstyń 190-baby 3-bóligi 4-tarmaǵy (Alaıaqtyq) boıynsha qylmystyq is qozǵaldy.

«Bıylǵy jyldyń sáýir aıynda A. esimdi sottalýshy saýda ortalyǵyna kelip, adamdarǵa arzan baǵamen 17 qap qant satyp alýdy, satyp alýshylardy taýyp, taýarlardy satýdy usynǵan. Jábirlenýshiler sottalýshynyń qaskóılik nıetine kúmán keltirmeı, usynysymen kelisip, aqshany onyń shotyna aýdarǵan. Aqshany ıemdengen sottalýshy qylmys ornynan qashyp, telefonyn sóndirip, qarajatty jeke qajettilikterine jumsaǵan. Osylaısha ol jábirlenýshilerge jıyny 235 myń teńge materıaldyq zalal keltirdi»,-dep habarlady aýdandyq sottyń baspasóz qyzmeti.

Qylmystyq kodeks boıynsha mundaı qylmys úshin 3 jyldan 7 jylǵa deıingi merzimge bas bostandyǵyn shekteý nemese múlki tárkilenip, sol merzimge bas bostandyǵynan aıyrý jazasy kózdelgen.

Sotta prokýror sottalýshyǵa 3 jylǵa bas bostandyǵynan aıyrý jazasyn taǵaıyndaýdy surady.

Sottalýshy kinásin tolyq moıyndap, jasaǵan qylmysy úshin ókindi.

Sot úkimimen A. esimdi azamat alaıaqtyǵy úshin kináli dep tanyldy. Ol 3 jyl 6 aı probatsııalyq baqylaýda bolady jáne 100 saǵattyq májbúrli eńbekke jegiledi.

Jábirlenýshilerdiń azamattyq talaby tolyq qanaǵattandyryldy.

Jaza taǵaıyndaý kezinde sot kinásin moıyndaý, ókiný, kámeletke tolmaǵan balanyń asyraýynda bolýy sııaqty kináni jeńildetetin jaǵdaılardy eskerdi.

Úkim zańdy kúshine endi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT