Almatyda tonalǵan depýtat: Polıtseıge qatysty tergeý bastaldy

ALMATY.QazAqparat – Almatyda Májilis depýtaty Irına Smırnovany tonap ketken jerge kelgen polıtseıge qatysty tergeý jumysy bastaldy, dep habarlaıdy QazAqparat tilshisi.

Buǵan deıin depýtat oqıǵa ornyna kelgen polıtseıdiń sózine keıigenin jazǵan bolatyn. Ol Smırnova hanymǵa: «Nege ýaıymdaısyz? Bul buryn da bolǵan, bar jáne bola beredi. Urylar árqashan bolady. Endi ne deısiz?» degen.

«Oqıǵa ornyna kelgen polıtseıge qatysty qyzmettik tergeý júrgiziledi. Onyń nátıjesi boıynsha tártiptik shara qoldanylady. Degenmen, qaramaǵymdaǵy qyzmetkerdiń áreketi úshin keshirim suraımyn», - dedi qalalyq polıtsııa departamentiniń basshysy, polıtsııa general-maıory Serik Kúdebaev.

Eske sala keteıik, 5 qańtar kúni Irına Smırnova tonaý faktisimen polıtsııaǵa aryz jazǵan bolatyn. Onyń aryzy QR QK 188-baby boıynsha (Urlyq) sotqa deıingi tergeý biryńǵaı reestrinde tirkeldi.

«Qylmysty ashý jáne kúdiktini ustaý úshin jedel tergeý toby quryldy, onyń quramynda qalanyń qylmystyq polıtsııa qyzmetkerleri bar. Qazirgi ýaqytta tergeý jáne jedel sharalarmen qatar, qalanyń beınebaqylaý júıelerine, sonymen qatar qylmys bolǵan jerge monıtorıng jasalyp jatyr», - dep tolyqtyrdy Serik Kúdebaev.

Aıta keteıik, Irına Smırnova – Qazaqstan Parlamenti Májilisiniń depýtaty.