Jańalyqtar  >

Almatyda taý bókterinde salynyp jatqan úılerdiń qurylysy toqtatyldy - Erbolat Dosaev

2022 jylǵy 29 qyrkúıek, 12:55
Almatyda taý bókterinde salynyp jatqan úılerdiń qurylysy toqtatyldy - Erbolat Dosaev

ALMATY. QazAqparat – Erbolat Dosaev «Kamenskoe plato» observatorııasynyń aýmaǵynda alma aǵashtary otalyp, ornyna zańsyz salynyp jatqan qurylys týraly aıtty, dep habarlaıdy QazAqparat tilshisi.

Qala ákimimen kezdesýde Medeý aýdanynyń turǵyny ákimnen zańsyz salynyp jatqan qurylysqa tyıym salýyn surady.

«2014 jyly «Kamenskoe plato» aımaǵyndaǵy J1-ge zańsyz berilgen sony R1-ge qaıtarý qajet. Osy ýaqyt ishinde qurylys salýshy kóptegen gektar alma baǵyn kesip tastady, kóshkin júrdi. Qazir zańsyz qurylys júrip jatyr, jeke turǵyn úıdiń ornyna kóp páterli turǵyn úıler salyna bastady. Bul aýmaqta sý da, káriz de joq. Sizden kómek suraımyz», - dedi ol.

Qala ákimi atalǵan mekenjaıdaǵy alma baqtaryn kesý jaǵdaıy boıynsha qalalyq prokýratýra ekologııa jáne qorshaǵan ortany qorǵaý departamentimen birlesip jumystar júrgizgenin jetkizdi. Zańsyz qurylystyń toqtatylǵanyn aıtty.

«Kóptegen joba boıynsha biz qurylysty toqtattyq, protsesterdi aıaqtaý úshin sotqa tıisti shaǵymdar men aryzdar berdik. Bul 2014 jyly Almaty oblysy Talǵar aýdanynan qalaǵa jańa aýmaqtar qosylǵan kezde bolǵan. Dál osyndaı jaǵdaı basqa aýdandarda da bar, olar R1-den J1-ge aýystyrylǵan. Jeke úılerge ruqsaty joq sol zańsyz qurylysty toqtattyq. Ony bastapqy aýmaqqa qaıtarý ońaı emes. Sol jyldary berilgen jer telimderiniń sany myńdaǵan», - dedi Erbolat Dosaev.

Sondaı-aq, ákim kóshkin qaýpi joǵary aımaqtarǵa qosymsha zertteý júrgiziletinin aıtty. Jumys erekshe baqylaýda.

Eske salsaq, Almatynyń taýly aýdandarynda qurylysqa tyıym salynǵan bolatyn.


Tegı:
Almaty   Ákim   Qurylys  
Uqsas jańalyqtar
Seriktester jańalyqtary

Jańalyqtar