Almatyda sıntetıkalyq esirtki tasymaldaý kanaly áshkerelendi

ALMATY. QazAqparat – Almaty polıtsııasy sıntetıkalyq esirtki tasymaldaý kanalyn áshkereledi, dep habarlaıdy QazAqparat tilshisi.

Uqsas jańalyqtar

Esirtki jarnamasy bar bannerdi ornalastyrýshy deldal Qaraǵandyda ustaldy

Qylmystyq topty 33 jastaǵy Túrksib aýdanynyń turǵyny basqarǵan.

«Ustalmas buryn kúdikti óziniń tanysyna 1 sirińkeniń qoraby kólemindeı «alfa-PVP» psıhotropty zatyn 40 myń teńgege satyp jibergen. Osy mámileden soń ol ustaldy. Arnaıy operatsııa Boraldaı kóshesinde boldy. Odan ári turǵylyqty mekenjaıynda tintý júrgizildi. Nátıjesinde peshtiń ishinen paket tabyldy. Onyń ishinen sur tústi untaq zatty birneshe paketke orap bólingen. Júrgizilgen hımııalyq saraptamadan soń tárkilengen hımııalyq zattardyń salmaǵy 1 keli 760 gramnan asatyny anyqtaldy», - dedi Almaty qalalyq polıtsııa departamenti basshysynyń orynbasary Berik Ábilbekov.

Tergeý tobynyń anyqtaǵanyndaı, kúdikti qylmystyq pıǵylyn júzege asyratyn kezde satyp alýshylarmen kezdespegen. Ol klıentterge esirtkini jasyryp qaldyryp otyrǵan. Keıin aqshasyn elektrondy tólem júıesi arqyly alyp otyrǵan.

«Jaqyn arada bul sıntetıkalyq psıhotropty zattardyń Almatyǵa jetý kanaly áshkerelenedi. Qazir kúdikti qamaýda otyr. Oǵan QR QK 297-babynyń 1-bólimimen, 287-babynyń 2-bólimimen aıyp taǵylǵan. Odan bólek kúdiktiniń úıinen «Strımer» markali travmatıkalyq tapansha, qol granatasy, ańshy pyshaǵy tabyldy», - dedi podpolkovnık Ábilbekov.

Aıta ketý kerek, munyń aldynda qalada jastar arasynda esirtki jarnamasy ashyq bannerlerde jarııalanǵan bolatyn.

Keıin ákimshilik pen polıtsııa bul bannerlerdi demontajdady.

Mundaı ashyq bannerler Óskemen, Shymkent, Astana, Qaraǵandy qalalarynda da ornalasqan.

Qalalyq polıtsııa departamentiniń Esirtki bıznesine qarsy kúres basqarmasynan habarlaǵandaı, «Narýjnaıa reklama» JShS ókili QR ÁqbK 423-baby boıynsha ákimshilik jaýapkershilikke tartyldy. Bul bap boıynsha zańdy tulǵalarǵa 300 AEK kóleminde aıyppul qarastyrylǵan.