Almatyda ózin polıtsııa qyzmetkeri retinde tanystyratyn alaıaqtar kóbeıip ketti
2022 jylǵy 30 maýsym 12:57

Almatyda ózin polıtsııa qyzmetkeri retinde tanystyratyn alaıaqtar kóbeıip ketti

ALMATY. QazAqparat - Almaty qalalyq Polıtsııa departamenti bastyǵynyń orynbasary Rýstam Ábdirahmanov turǵyndardy ınternet-alaıaqtardan saq bolýǵa shaqyrdy, dep habarlaıdy QazAqparat tilshisi.

«Qylmyskerler mynandaı shemamen áreket etedi: olar uıaly telefonǵa qońyraý shalyp, ózin polıtsııa qyzmetkerimin dep tanystyrady. Sonyń ishinde meniń de atymdy ataýy múmkin. Sodan keıin sizdiń atyńyzǵa nesıe almaq bolǵan alaıaqtardy ustaý úshin qazir arnaıy operatsııa júrgizilip jatqanyn eskertedi»,- dep jazdy Rýstam Ábdirahmanov óziniń telegram-kanalynda.

Rýstam Ábdirahmanovtyń aıtýynsha, «jalǵan polıtsııa qyzmetkerleri» qazir QR Ulttyq bankimen birlesip jumys isteıtinin habarlap, dál sol kezde olarmen baılanysatynyn aıtyp, jelide qalýdy suraıdy. Bul – alaıaqtardyń taǵy bir áreketi.

«Odan keıin telefonnyń arǵy jaǵyndaǵy adam sizdiń kartańyzǵa ruqsatsyz aqsha aýdarý áreketteri júrip jatqanyn jáne aqshańyzdy saqtaý úshin bank shotyna nemese úshinshi tulǵalardyń shotyna belgili bir somany salý kerek ekenin aıtyp, úgitteıdi»,- dep atap ótti polıtsııa ókili.

Almaty qalalyq polıtsııa departamenti bastyǵynyń orynbasary polıtsııa qyzmetkerleri eshqashan telefon arqyly arnaıy operatsııalar men tergeý áreketterin júrgizbeıtinin eskertti.

«Mundaı jaǵdaılarda telefonmen sóılesýdi toqtatyp, bank kartasynda nemese bank saıtynda kórsetilgen senimdi nómirge qaıta qońyraý shalý kerek. Qandaı jaǵdaı bolmasyn bank kartańyzdyń derekterin, sonymen qatar jeke basyńyzǵa qatysty málimetterińizdi eshkimge aıtpańyz, jibermeńiz», – dedi Rýstam Ábdirahmanov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT