Almatyda mysyr dári-dármegi shyǵarylady

ASTANA. QazAqparat -Almatyda qazaqstandyq-mysyrlyq farmatsevtıkalyq park qurylady. Bul týraly búgin QR Syrtqy ister mınıstrligindegi brıfıngte Qazaqstanyń Mysyrdaǵy Tótenshe jáne Ókiletti Elshisi Arman Isaǵalıev aıtty, dep habarlaıdy QazAqparat tilshisi.

«Qazirgi ýaqytta eki el arasynda birqatar ınvestıtsııalyq joba júzege asyrylýda. Olardyń eń bastysy - Almatyda qazaqstandyq-mysyrlyq farmatsevtıkalyq park qurý bolmaq. Qazirgi ýaqytta Investıtsııalar jáne damý mınıstrligimen, «Kazakh Invest» ulttyq kompanııasymen birge bul jobany talqylap jatyrmyz», - dedi ol.

Onyń aıtýynsha, búginde Qazaqstannyń naryǵynda mysyrlyq dári-dármekter óte kóp satylady. Olardyń sapasy joǵary jáne baǵasy arzan bolǵandyqtan suranysqa ıe.

«Qazirgi ýaqytta qazaqstandyq naryqta 40-tan astam mysyrlyq dári-dármek tirkelgen. Menińshe, osynda farmatsevtıkalyq park qurý arqyly biz atalǵan ónimderdi óńirdiń jáne EAEO-nyń naryqtaryna shyǵaratyn bolamyz»,- dedi Arman Isaǵalıev.

Elshiniń dereginshe, joba quny 25 mıllıon dollardy quraıdy.

«Qazirgi ýaqytta mysyrlyq MUP farmatsevtıka kompanııasy seriktes izdeý jumysyn júrgizip jatyr. Olar atalǵan somanyń basym bóligin quıýǵa daıyn. Jobany 2016 jyly júzege asyrýǵa daıyn bolǵan edi. Alaıda, mysyr valıýtasy eki ese qunsyzdanyp ketti. Dál osy sebepke baılanysty olar qarjylandyrýshy seriktes izdeýge májbúr bolyp otyr»,- dedi dıplomat.