Almatyda munara kranynyń nelikten qulaǵany belgili boldy
2022 jylǵy 27 maýsym 21:23

Almatyda munara kranynyń nelikten qulaǵany belgili boldy

ALMATY. QazAqparat – Almatyda kóktemde qurylys alańynda KB-308 relsti munara krany qulaýynyń sebebi anyqtaldy, dep habarlaıdy QazAqparat tilshisi.

Bıyl sáýir aıynda Almatynyń «Jas qanat» shaǵynaýdanynda KB-308 relsti munara krany 9 qabatty ǵımarattyń parapetine qulaǵan bolatyn.

Osyǵan oraı quramynda Almaty qalalyq ónerkásiptik qaýipsizdik departamenti men túrli múddeli taraptardyń ókilderi bar komıssııa apatqa tekseris júrgizdi.

Komıssııanyń málimetinshe, tekseris obektıvti jáne jan-jaqty júrgizý maqsatynda «TehBez Almaty» JShS-nyń tehnıkalyq saraptamasy taǵaıyndaldy.

Krannyń metall konstrýktsııalarynyń úlgilerin «SAPA INTERSISTEM» JShS synady. Kran bólshekteriniń metalyna metallografııalyq taldaý júrgizildi.

«Kran elementterin zertteý boıynsha ónerkásiptik qaýipsizdik saraptamasynyń qorytyndysy negizinde krannyń qulaýynyń yqtımal sebebi - kran qulaǵan jerdegi rels jolynyń shógýi, sondaı-aq, kran sektsııalary shpılkalarynyń burandaly qosylystarynyń tozýy jáne sozylýy.

Sondaı-aq, komıssııa ónerkásiptik qaýipsizdik talaptarynyń birqatar buzýshylyqtaryn anyqtady:

- óndiristik baqylaý uıymdastyrylmaǵan;

- óndiristik baqylaý týraly ereje ázirlenbegen;

- ónerkásiptik qaýipsizdik jaǵdaıyna tekserý júrgizý kestesi bolmaǵan;

- júk kótergish krandardyń, almaly-salmaly júk qarmaý qurylǵylary men ydystardyń qaýipsiz paıdalanylýyn qadaǵalaý boıynsha jaýapty ınjenerlik-tehnıkalyq qyzmetker, kran joldarynyń tehnıkalyq jaı-kúıin tıisti túrde qadaǵalaýdy júzege asyrmaǵan jáne ónerkásiptik qaýipsizdik qaǵıdalaryn buzýdyń aldyn alý úshin shara qoldanbaǵan», - delingen komıssııa habarlamasynda.

Tekseris nátıjesi boıynsha komıssııa apattyń sebepterin joıý jáne bolashaqta osyndaı jaǵdaılardy boldyrmaý jóninde usynymdar berdi.

Al qurylys kompanııasy ınjenerlik-tehnıkalyq qyzmetkerdi jaýapkershilikke tartty.


Seriktester jańalyqtary

Jańalyqtar

Úrdis

MURAǴAT