Almatyda qonaqúıden órt shyǵyp, 57 adam evakýatsııalandy
2022 jylǵy 20 mamyr 09:48

Almatyda qonaqúıden órt shyǵyp, 57 adam evakýatsııalandy

ALMATY. QazAqparat- Almatyda «Hotel Plaza Almaty» qonaq úıinen órt shyǵyp, 57 adam qutqaryldy, dep habarlaıdy QazAqparat tilshisi.

«19 mamyr kúni saǵat 22:21 – de Almaly aýdany, Qojamqulov kóshesi, 270/120 mekenjaıy boıynsha ornalasqan «Hotel Plaza Almaty» qonaqúıindegi órt týraly habarlamaǵa órt sóndirýshiler shyqty. Oqıǵa ornyna kelgen órt sóndirý brıgadasy 6 qabatty qonaqúıdiń tsokoldyq qabatynda ornalasqan, saýnanyń janyp jatqanyn anyqtady. Ǵımarattyń barlyq qabatyn qoıý qara tútin basyp, adamdar ómirine qaýip týǵan»,- deıdi qalalyq Tótenshe jaǵdaılar departamentiniń bastyǵy Rýslan Qasybaev.

Aıtýynsha, qonaqtar qonaqúıdiń terezelerinen kómek suraǵan. Órt sóndirýshiler dereý qutqarý jumystaryn bastady. Kúshter men quraldardy jumyldyrý boıynsha órt bolǵan jerde jedel shtab quryldy. Qutqarý jumystaryna gaz tútininen qorǵaý qyzmetiniń 12 býyny, úsh órt sóndirý avtosatysy, tórt úsh ıindi jyljymaly baspaldaq jumyldyryldy.

«Janý kontsentratsııasynyń ónimderiniń azaıtý jáne tútindi joıý úshin AD-120 avtomobıli qoldanyldy. Qabyldanǵan jedel sharalardyń arqasynda 57 adam qutqaryldy. Qurban bolǵandar joq. Órt saǵat 23:25-te (kelgen sátten bastap 59 mınýt) aýyzdyqtalyp, saǵat 23:44-te sóndirildi. Órtti sóndirýge jeke quramnan 42 adam, 14 birlik tehnıka jumyldyryldy»,- dedi departament basshysy.


Uqsas jańalyqtar
Avtor:
Tilshi

Jańalyqtar

MURAǴAT