Almatyda ıt pen mysyqqa qutyrýǵa qarsy vaktsına salynady
2022 jylǵy 25 mamyr 18:26

Almatyda ıt pen mysyqqa qutyrýǵa qarsy vaktsına salynady

ALMATY. QazAqparat - Bıyl Almatyda qutyrýǵa qarsy 36 myń ıt pen 8 myń mysyqqa vaktsına salynady. Bul týraly qalalyq veterınarlyq qyzmet basshysy Ádis Seıdaqmatov málim etti, dep habarlaıdy QazAqparat tilshisi.

«Qutyrý vırýsy - tabıǵı-oshaqty ólimge ákelip soǵatyn asa qaýipti juqpaly aýrý. Aýrý haıýanattyń silekeıi arqyly juǵady. Sonan soń júıke joldary arqyly tarala otyryp, silekeı bezderine, mı qyrtysynyń jasýshalaryna, gıppokampqa, býlbar ortalyǵyna jetedi de, olardy zaqymdaı otyryp, ólimge ákelip soǵatyn aýyr aqaýlardy týdyrady. Osyǵan baılanysty, aýrýdyń aldyn alý jumysy qala bıliginiń erekshe baqylaýynda. Keıingi 36 jyl ishinde Almaty qalasynyń aýmaǵynda adamdardyń qutyrý aýrýyn juqtyrǵan jaıttary anyqtalmady, bul - aldyn alý is-sharalarynyń tıimdiligin bildiredi. Bıyl 36 myń ıt pen 8 myń mysyqqa vaktsına egý josparda», - deıdi Ádis Seıdaqmatov.

Sonymen qatar, ol ıt qaýyp alǵan jaǵdaıda, qutyrýǵa qarsy kómek alý úshin jedel túrde jaqyn aradaǵy jaraqat pýnktine júginý qajettigin aıtty.

«Ehınokokkozdyń aldyn alý sheńberinde 44 myń úı janýaryn gelmıntsizdendirýdi josparlap otyrmyz. Ehınokokkoz – baýyrda, ókpede nemese basqa da organdar men teride parazıttik kıstalardyń paıda bolýymen sıpattalatyn tsestodoz tobynyń gelmıntozy. Qozdyrýshysy - Echinococcus granulosus ehınokogynyń ósetin, damıtyn jáne adam organızminde ondaǵan jyldar boıy ómir súretin dernásil. Ol ishi suıyqtyqqa tolǵan dóńgelek nemese sopaq kısta túrinde bolady», - dedi spıker.

Buǵan deıin Almatyda jyl basynan beri 1400-den astam adamdy ıt qaýyp alǵany habarlandy.



Avtor:
Tilshi

Jańalyqtar

MURAǴAT