Almatyda ıisti gazdan 30 adam ýlanǵan

ALMATY. QazAqparat - Almatyda jyl basynan beri 30 adam gazdan ýlanyp, zardap shekti, dep habarlaıdy QazAqparat tilshisi.

«Jyl basynan beri 10 tótenshe jaǵdaı tirkeldi. 30 adam gazdan jáne janǵan zattardyń tútininen ýlandy. Onyń 19-y – balalar. Oqıǵalardyń birinde tabıǵı gaz taralyp, aýa-gaz qospasy jarylǵan. Saldarynan eki adamnyń denesin (80 - 100%) kúıik shalyp, kóz jumdy. Úsh jaǵdaıda 8 adam aýyr jaǵdaıda aýrýhanaǵa jetkizildi, qalǵan 7 jaǵdaıda - 27 adam ortasha jáne jeńil dárejede jaraqat aldy», - deıdi Almaty qalalyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova.

On tótenshe jaǵdaıdyń, úsheýi 2019 jyldyń qańtar-mamyrynda boldy. Onda 6 adam zardap shekti. Jeti jaǵdaı 1 qazan - 14 qarasha aralyǵynda tirkeldi. Bul kezde 24 adamǵa kómek kórsetildi.

«Bul rette, 4 jaǵdaıda adamdar ıisti gazǵa qatty otynmen janatyn peshterdiń aqaýynan, 4 jaǵdaıda gaz qazandyqtarynan gazdyń shyǵýynan jáne 1 jaǵdaıda úı ıesiniń nemquraılylyǵynan ballonnan propan gazynyń shyǵýynan ýlanǵan»,- dep habarlady departamentten.

Tabıǵı gazdyń taralýynan eki tótenshe jaǵdaı oryn aldy. Bireýinde aýa-gaz qospasy jarylyp, bir adam mert boldy. Ekinshi jaǵdaıda – úıden órt shyǵyp, turǵyndar ystan ýlandy.