Almatyda Gazel avtokóligi órtenip ketti
ALMATY. QazAqparat – Almatyda «Gazel» markaly avtokóligi órtke orandy, dep habarlaıdy QazAqparat tilshisi.
Almaty qalalyq TJD-nyń málimetinshe, túski saǵat 12:45-te Bostandyq aýdany, Volodarskıı kóshesi, 33-úıdiń janynda «Gazel» avtokóliginiń órtengeni týraly habarlama túsken.
«Órt sóndirýshiler saǵat 12:54-te jetken sátte, «Gazel» markaly avtokóliktiń ashyq jalynmen órtenip jatqany anyqtaldy. Úsh sharshy metr aýmaqty qamtyǵan órt 6 mınýt ishinde joıyldy», - dep habarlady vedomstvodan.
Almaty qalalyq TJD-da oqys oqıǵany beıne kameraǵa túsirer aldynda qaýipsiz jerde turý qajet ekenin eskertti.
«Oqys oqıǵanyń kýágeri bolǵan adam ýaqyt joǵaltpaı, kezekshi bólim 101-ge habarlaý kerek, sondaı-aq, beıne kameraǵa túsirer aldynda qaýipsiz qashyqtyqqa turýy kerek. Sebebi, oqıǵa ornyna jaqyn jerde adam ómirine qaýip tónýi múmkin. Gaz-ballon jabdyqtary qyzmet kórsetý stantsııalarynyń mamandandyrylǵan ortalyqtarynda ornatylýy qajet», - dep eskertti TJD.
