Almatyda fılm túsirýdi uıymdastyrýǵa kómektesetin jańa qurylym paıda bolady

ALMATY. QazAqparat – Almaty ákimi Baqytjan Saǵyntaev qalada sheteldik jáne otandyq kınokompanııalarǵa fılm túsirýdi uıymdastyrýǵa kómektesetin jańa qurylym paıda bolatynyn aıtty, dep habarlaıdy QazAqparat tilshisi.

Ákimniń aıtýynsha, Almaty – fılm túsirýge yńǵaıly qala. Almatynyń aýa raıy óte qolaıly. Bes klımattyq aımaq bar. Keremet landshafttar men damyǵan ınfraqurylym kez-kelgen janrdaǵy fılmderdi túsirýge yńǵaıly. «Qazirdiń ózinde Almaty men Almaty oblysyna shet memleketterdiń stýdııalary mýzykalyq beıneklıpter, jarnama men derekti fılmder túsirýge jıi keledi. Qala ákimdigi janynan barlyq jaǵdaıdy jasaý úshin Almaty Film Commission arnaıy qurylym quryldy. Bul «bir tereze» qaǵıdaty boıynsha sheteldik jáne otandyq kınokompanııalarǵa Almatyda da, kıno túsirýdi uıymdastyrýǵa kómektesedi», - dedi Baqytjan Saǵyntaev Almaty Investment Forum aıasynda.

Ákim kıno bıznesi, bilim berý jáne memlekettiń tyǵyz ózara is-qımylynyń arqasynda biz otandyq kınematografııany damytyp, Almatyny álemdik kıno túsiretin alańǵa aınaldyrýǵa nıetti ekenin dep atap ótti

«Bul tek bizdiń qalamyzdyń bedelin kóterip qana qoımaıdy, sonymen birge týrızmniń damýyna, orta jáne shaǵyn bıznestiń damýyna kóp áser etedi. Men sonymen qatar anımatsııa óndirisine toqtalǵym keledi. Keńes dáýirinde Almaty anımatsııa mektebi joǵary nátıjelerge qol jetkizdi. Qazir anımatsııalyq stýdııalar is júzinde joq - bul ınvestıtsııalar úshin úlken rezerv. Bizdiń anımatorlardyń úlken áleýetke ıe ekendigine senimdimin, ony damytý qajet «, - dedi Baqytjan Saǵyntaev.