Almatyda azyq-túlik ónimderi qate tańbalanǵan
2022 jylǵy 23 mamyr 22:03

Almatyda azyq-túlik ónimderi qate tańbalanǵan

ALMATY. QazAqparat – Almatyda azyq-túlik ónimderiniń tańbalanýynda sáıkessizdikter anyqtaldy, dep habarlaıdy QazAqparat tilshisi.

Almaty qalasynyń sanıtarııalyq-epıdemıologııalyq baqylaý departamentiniń bıylǵy jyldyń alǵashqy tórt aıynda ónim qaýipsizdigine monıtorıng júrgizý sheńberinde saýda jelisinde et, balyq, qus ónimderi, kókónister, jemister jáne basqa da azyq-túlik ónimderiniń 624 synamasyn iriktep aldy. Monıtorıng barysynda tehnıkalyq reglamentterdiń talaptaryna sáıkes kelmeıtin 332 synama anyqtalyp, onyń ishinde tańbalaý boıynsha sáıkessizdik 271 synamany qurady. Bul ótken jylmen salystyrǵanda aıtarlyqtaı az (2021 jyly 373 synamadan anyqtalǵan).

Vedomstvo tańbalaý týraly men qate tańbalaýdyń saldary týraly habarlady.
«Tańbalaý - tutynýshyny ónim týraly aqparattandyrýdyń negizgi ádisi bolyp tabylady. Tańbalaýdyń arqasynda satyp alýshylar tamaq ónimderiniń quramy, jaramdylyq merzimi, óndirýshi jáne t.b. týraly biledi. Tańbalaýǵa qoıylatyn talaptar qoldanystaǵy zańnamamen jáne tıisti normatıvtik-quqyqtyq aktilermen belgilenedi.
Tańbalaý degen - belgili bir ónimge qatysty taýarlar men qyzmetterge arnalǵan sıpattamalar, sýretter jáne sımvoldar. Tańbalaý ydysqa, býyp-túıý materıalyna, zatbelgige, japsyrmalarǵa, stıkerlerge jáne qaptamanyń basqa elementterine ornalastyrylady.
Tańbalaýdaǵy eń mańyzdysy - bul ónimniń jaramdylyq merzimin kórsetý. Saqtaý merzimi qysqa azyq - túlikterde kúni men aıy, ortasha - bir aı, uzaq ýaqyt - tek jyly kórsetiledi. Árbir tutynýshy ónimniń tańbalaýynda onyń daıyndalǵan kúni men jaramdylyq merziminiń bolmaýy buzýshylyq bolyp tabylatynyn bilýi tıis, bul jaǵdaıda ónim týraly barlyq málimetter kórsetilgen basqa óndirýshiniń ónimderin satyp alǵan jón nemese satýshydan tez buzylatyn tamaq ónimderine taýarǵa ilespe qujattardy berýdi suraǵan jón, onda óndirýshi mindetti túrde daıyndalǵan ýaqyty men kúnin, sondaı-aq, ónimniń sapasy men qaýipsizdigin, ónimdi saqtaý temperatýrasy jáne jaramdylyq merzimin kórsetý qajet.
Qate tańbalaý ónim óndirýshi úshin birqatar jaǵymsyz saldarlardy týdyrýy múmkin, mysaly, tańbalaýǵa ózgerister engizý, ónimdi satýǵa ýaqytsha tyıym salý, aıyppuldar jáne anyqtalǵan buzýshylyqtarǵa baılanysty keltirilgen shyǵyndardy óteý», - delinedi habarlamada.
Qalalyq sanıtarııalyq-epıdemıologııalyq baqylaý departamenti turǵyndardan ónimderdi tańbalaýdyń sáıkessizdigi anyqtalǵan jaǵdaıda Jibek joly dańǵyly, 5 meken-jaıyna (el. meken-jaıy: dsek.almaty@dsm.gov.kz, tel: 382-35-15) nemese buzýshylyqtyń naqty faktilerin kórsete otyryp, «Elektrondyq úkimet» portaly arqyly shaǵymdanýǵa bolatynyn jetkizdi.
Eske salaıyq, buǵan deıin Qazaqstanda taýarlardy tańbalaý protsesi qalaı júzege asyp jatqany jáne dárilik zattardy tańbalaý bıyl 1 shildeden bastalatynyn habarlaǵan bolatynbyz.


Uqsas jańalyqtar

Jańalyqtar

MURAǴAT