Almaty jaryqsyz qaldy: Ákimdik túsinik berdi
2022 jylǵy 25 qańtar 12:56

Almaty jaryqsyz qaldy: Ákimdik túsinik berdi

ALMATY. QazAqparat – Almatynyń birneshe aýdanynda elektr energııasy óship qaldy, dep habarlaıdy QazAqparat tilshisi.

Jaryq búgin túski saǵat 12:00 shamasynda sóndi.

Almaty kóshelerinde baǵdarshamdar jumys istemeı tur, joldarda keptelis paıda boldy.

«Jaryq KEGOC jelisiniń boıynda sóndi. Jelilerdegi kerneý tómendep ketti. AJK qosalqy stantsııalaryndaǵy avtomatty basqarý júıesi iske qosyldy», - habarlady Almaty ákimdiginen.

Sondaı-aq «Samuryq-Energo» AQ Almatyda elektr energııasynyń óshýine baılanysty túsinik berdi.

«Óńirdi energojúıeniń soltústik jáne ońtústik bólikterimen baılanystyratyn joǵary voltty elektr jelileriniń apatty túrde toqtaýyna baılanysty Almaty qalasy men Almaty energetıka ortalyǵy oqshaýlandyrylǵan jumysqa aýystyryldy», - dedi kompanııadan.

Óz kezeginde «Samuryq-Energo» AQ «AlES» AQ jáne «Moınaq» sý elektr stantsııalary óz júktemesin saqtap qalǵanyn jáne qazirgi ýaqytta júıelik operatordyń tapsyrysy boıynsha qýattylyǵyn arttyryp jatqanyn málim etti.

Bul rette málim etilgendeı, «Samuryq-Energo» AQ-nyń soltústik energııa kózderi – Ekibastuz GRES-i kórsetilgen júktemeni kidirissiz jumys istep tur. Ekibastuz GRES-1-de 6 energoblok jumys istep tur, aǵymdaǵy júkteme 2930 MVt, Ekibastuz GRES-2-de eki energoblok jumys isteıdi, júkteme 950 MVt.

Aıta keteıik, áleýmettik jelilerde elektr energııasy Almaty, Jambyl jáne Túrkistan oblystarynda da sóngeni jazylyp jatyr. Budan bólek, kórshi Ózbekstan elinde de jaryqsyz qalǵan óńirler bar.


Avtor:
Tilshi

Jańalyqtar

MURAǴAT