Almaty turǵyndary úıin buzaqylardan qalaı qorǵap qalǵanyn aıtyp berdi
2022 jylǵy 23 qańtar 12:54

Almaty turǵyndary úıin buzaqylardan qalaı qorǵap qalǵanyn aıtyp berdi

ALMATY. QazAqparat – Almatyda jappaı tártipsizdik kezinde turǵyndar úılerin búlikshilerden qorǵap qalǵan. Oqıǵanyń mán-jaıyn turǵyndar aıtyp berdi, dep habarlaıdy QazAqparat tilshisi.

Almatylyq turǵyndardyń bastan keshkenderin prodıýser Sáken Belgibaev Facebook paraqshasynda bólisti.

Oqıǵa Nazarbaev dańǵyly 220/3 mekenjaıynda kópqabatty turǵyn úıde bolǵan. Ol jerde birneshe meıramhana bolǵan jáne buzaqylyq kezinde olardy qıratqan.

Onymen qoımaı buzaqylar úıdi gazben jarǵysy kelgen. Jáne sol sátte kópqabatty turǵyn úıde túrli sebeptermen adam az bolǵan.

Úıin buzaqylardan qorǵaý úshin áıelder, egde jastaǵy kisiler men jergilikti aýla tazalaýshy Arlan shyqqan.

«5 qańtar. Tańǵy serýenge shyqtym. Túske qaraı mıtıng bastaldy. Balkonnan qarap 100-ge jýyq áskerdi baıqadym, qarýsyz, jas sarbazdar. Olar úshin qoryqtym. Sol sátte bir top adam kelip sarbazdardyń kaskasyn, qorǵanysh quraldaryn tartyp ala bastady. Al sarbazdar bolsa jan-jaqqa qashyp ketti. Mıtıngke shyqqandar qarapaıym adamdar emes sııaqty bolyp kórindi. Beıbit mıtıng degenimiz - adamdardyń belgili bir talappen, ıdeıamen nemese naqty bir máseleni kóterip shyǵýy. Balkonnan basymdy shyǵaryp «Úılerińe tarańdar» dedim. Meni baıqaǵan bireýi qorqyta bastady», - dedi kýáger.

Kýáger kórshileriniń aıtýynsha, buzaqylar kópqabatty turǵyn úıdiń jertólesin órtegen.

«Bizdiń úıdiń irgesinde 6 meıramhana bar. Turǵyndar baǵaly zattarymyz ben qujatymyzdy alyp ne bolyp jatqanyn bilý úshin syrtqa shyqtyq. Dala qarańǵy. Meıramhana ıeleri joq, onyń esigin ózimiz ashýǵa tyrystyq. Bárimizdi úreı basyp, sasqalaqtap qaldyq. Úı órtenip jatyr. Dereý órt sóndirý qyzmetine habarlastyq. Ol kelgenshe turǵyndar sý tasyp sóndirýge tyrysty. Sol jerde bolǵan kisiler kómektesti. Bir kezde meıramhanynyń birinen qolynda alkogoli bar bireý shyqty. Ol órt sóndirýge kedergi jasap, «órtene bersin» dedi. Men onyń betinen salyp qaldym, keıin ol ketip qaldy», - deıdi Kamıla Aıtqalıeva.

Birneshe áreketten keıin turǵyndar meıramhananyń esigin ashyp, aýla tazalaýshy Arlan órtti aýyzdyqtaǵan.

Turǵyndardyń aıtýynsha, kommýnaldyq qyzmet jumysshysy úıdi qorǵaý áreketiniń bas-aıaǵynda bolyp, ol da basyn qaýipke tikken.


Jańalyqtar

MURAǴAT