Almaty taýynda joǵalǵan týrıst qyzdy izdeý jumystary nátıje bermedi

ALMATY. QazAqparat – Almatyda taýda joǵalǵan týrıst Ásel Panarǵalıevany izdestirý jumystary taǵy toqtatyldy. QazAqparat bul týraly Respýblıkalyq jedel-qutqarý jasaǵyna silteme jasap habarlaıdy.

«Búgin, tańerteńgi saǵat 8-den bastap qarańǵy túskenge deıin taýda izdestirý-qutqarý jumystary júrgizildi. Ókinishke qaraı, olar nátıje bermedi. Іzdestirý toqtatyldy», - dep málim etti QR Іshki ister mınıstrligi Tótenshe jaǵdaılar komıteti Respýblıkalyq jedel-qutqarý jasaǵynyń baspasóz qyzmetinen.

Vedomstvo aqparatyna sáıkes, taýda izdestirý-qutqarý jumystary júrgiziletin ýaqyt 3 kúndi quraıdy. Odan ári, eger qosymsha mán-jaǵdaılar anyqtalyp jatsa jáne týystar tarapynan ótinish tússe, qutqarýshylar jumystardy qaıta jandandyra alady.

Eske salaıyq, boıjetkenniń joǵalǵany týraly 10 qarasha kúni belgili boldy. Ol taý týrızmimen aınalysyp júrgen. 9 qarasha saǵat 13:00 shamasynda ol Úlken Almaty (Josaly) kólinde túsken fotosyn áleýmettik jelige jarııalaǵan. Odan keıin baılanysqa shyqpaǵan.

Buǵan deıin júrgizilgen izdestirý jumystary qyzdyń týystarynyń ótinishi boıynsha toqtatylǵan bolatyn. Biraq keıin Á.Panarǵalıevanyń jaqyndary izdestirýdi jalǵastyrýdy qaıta surady.