Almaty saıabaqtarynda zııankesterge qarsy ý sebý jumysy júrip jatyr
2022 jylǵy 21 maýsym 21:16

Almaty saıabaqtarynda zııankesterge qarsy ý sebý jumysy júrip jatyr

ALMATY. QazAqparat – Almatylyqtar saıabaqtar men alleıalarda qýrap, sarǵaıyp ketken aǵashtardyń sýretteri men vıdeosyn áleýmettik jelide jarııalap jatyr, dep habarlaıdy QazAqparat tilshisi.

Ákimdiktiń baspasóz qyzmeti málim etkendeı, qalanyń jasyl qoryn saqtaý jáne abattandyrý maqsatynda 8 aýdan aýmaǵynda mamandandyrylǵan uıymdar jasyl jelekti zııankesterden qorǵaý úshin mehanıkalandyrylǵan jáne qolmen bıologııalyq tazartý jumystaryn júrgizip jatyr.

Óńdeý eldi mekender aýmaǵynda qoldanýǵa ruqsat etilgen bıologııalyq jáne keıbir jaǵdaılarda qaýiptiligi tómen klasty (R-4) hımııalyq preparat qoldanylady.

«Mysaly, «Bıtoksıbatsıllın», «Aktarofıt» mıkrobıologııalyq preparaty qoldanyldy. Bul preparattyń ereksheligi - onyń quramynda toksınder joq. Bul preparat adamdarǵa, araǵa, janýarlarǵa, qustar men balyqtarǵa qaýipsiz», - dep habarlady ákimdik.

Buǵan deıin Almaty ákimdigi Jazken Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýtynyń qyzmetkerlerimen birlesip, qalanyń jasyl qoryna monıtorıng júrgizdi. Nátıjıesinde, emen aǵashtarynan diń zııankesteri anyqtaldy. Qalada 2019 jyly ınvazıvti zııankes túrleri retinde tirkelgen bul zııankester Qyrǵyzstan aýmaǵynan ákelingen.

«Mamandandyrylǵan uıymdar jasyl jelekterge, jalpaq japyraqty aǵashtar men emenderge zııankesterden óńdeý jumystaryn júrgizdi. Jaýyn-shashynnyń kóp bolýy der kezinde óńdeý jumystaryn júrgizýge kedergi keltirip jatyr. Desek te, bul baǵyttaǵy jumystar jalǵasýda, ınfektsııa oshaǵy anyqtalǵan aýmaq jasyl ekonomıka basqarmasynyń baqylaýynda», - dep atap ótti qalalyq ákimdik ókilderi.

Buǵan deıin Almatynyń Baým toǵaıynda 3 myńnan astam aǵash kesiletini týraly jazǵan bolatynbyz.




Uqsas jańalyqtar

Jańalyqtar

Úrdis

MURAǴAT