Almaty polıtsııasy jalǵan memlekettik nómir taǵyp júrgen 218 kólikti anyqtady
2022 jylǵy 12 tamyz 16:01

Almaty polıtsııasy jalǵan memlekettik nómir taǵyp júrgen 218 kólikti anyqtady

ALMATY. QazAqparat- Almatyda jalǵan memlekettik nómir taǵyp júrgen 218 kólik anyqtaldy. Almatynyń bas polıtseıi jalǵan memlekettik nómirlerdi paıdalanýdyń árbir deregi muqııat tekseriletinin aıtty, dep habarlaıdy QazAqparat tilshisi.

Almaty qalalyq polıtsııa departamentiniń bastyǵy Arystanǵanı Zapparov «Qorǵaý – Qaýipti júrgizýshi» avtomattandyrylǵan júıesiniń jumysymen tanysty.

Aıtýynsha, kúnine 800 myńnan astam kólik júretin iri shahar jaǵdaıynda bul júıe óziniń tıimdiligin kórsetti.

Ol jalǵan nómirlerdi paıdalanatyn júrgizýshilerdi, jarys uıymdastyryp, agressıvti júrgizýge jol bergenderdi anyqtaýǵa, sondaı-aq, abaısyzda qaıǵyly oqıǵaǵa ákeletin, jol qozǵalysy erejelerin elemeıtin jol qozǵalysyna qatysýshylardy anyqtaýǵa baǵyttalǵan.

«Jalǵan nómirdi júrgizýshiler ádette, beınebaqylaý júıelerin aınalyp ótý úshin jáne qylmys jasaǵanda qoldanady. Bizdiń mindetimiz – mundaı derekterdiń aldyn alý jáne ony joıý. Polıtsııanyń aldyńǵy sheptegi bólimsheleri men aqparattyq tehnologııalar mundaı quqyq buzýshylyqtardy anyqtaýǵa barynsha jumyldyryldy», – dedi Arystanǵanı Zapparov.

Almaty polıtsııasy basshysynyń aıtýynsha, tek osy aıdyń basynan beri qala joldarynda kólik quralyn jalǵan memlekettik tirkeý nómirlerimen basqarýdyń 218 deregi, memlekettik tirkeý nómirlik belgisi joq kólik quralyn basqarýdyń taǵy 773 deregi anyqtalǵan. Sonymen qatar, osy aıdyń basynan beri 4 egiz kólik ustaldy.

«Sondaı-aq, jol qozǵalysy erejelerin júıeli túrde buzyp, aıyppul tóleýden jaltaryp júrgen kólikterdi ustaý jumystary júrgizilýde. Osy maqsatta iri kólemdegi ákimshilik aıyppuldary bar kólikterdiń tizimin jasadyq. Máselen, keshe I. esimdi azamattyń basqarýynda bolǵan VAZ-21114 avtokóligi ustaldy, onyń 2,4 mln teńgeden astam tólenbegen aıyppuly bar. Osy aıdyń basynan beri jalpy qaryzy 11 mıllıon teńgeden asatyn 9 kólik mamandandyrylǵan aıyppul turaǵyna ornalastyryldy», – dep tolyqtyrdy Arystanǵanı Zapparov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT