Almaty-Óskemen trassasynyń sý shaıǵan bóligi bir aıda jóndeletin boldy

TALDYQORǴAN. QazAqparat - QazAvtojol «Almaty-Óskemen» trassasyndaǵy sý shaıyp ketken joldy bir aıda jóndeıtinin málimdedi, - dep habarlaıdy.

Qazir halyq aınalma jol arqyly qatynaýda.

«Qubyrdyń sý ótkizý mólsherin biz endi kórdik. Joba boıynsha qosylǵan bizdiń qubyrymyzdyń qanshalyqty óziniń mindetin atqara alatynyna kózimiz jetti. Endi basqa da jobalaýshy, jol sapasyn qadaǵalaıtyn, merdiger mekemelermen birlese otyryp, jınalys ótkizip, sol suraqty qarastyryp, múmkindiginshe jańa qubyr alyp kelýimiz kerek», - dedi «QazAvtoJol» UK Almaty oblystyq fılıaly dırektorynyń orynbasary Nurhat Aqyltaev.

Nurhat Aqyltaevtyń aıtýynsha, sý shaıǵan jol shamamen bir aıda jóndeledi.

Esterińizge sala keteıik, Almaty-Óskemen tasjoly paıdalanýǵa berilmeı jatyp, sý ótkizetin qubyr ornatylǵan tusyn sý shaıyp ketti. Tolassyz jaýǵan jaýyn 2017 jyly jasalǵan joldyń aǵyn sýdy ótkizetin ýchaskesin, uzyndyǵy úsh-tórt metrdeı bolatyn asfaltin shaıyp ketti.

Aıta keteıik, Almaty-Óskemen tasjolynyń Taldyqorǵan-Úsharal baǵytyndaǵy, ıaǵnı 313 shaqyrym joldy qytaıdyń «SITIC Construction» kompanııasy salyp jatyr. Jol qurylysyna 120 mıllıard teńgeden asa qarjy bólingen.