Almaty oblysynyń Raıymbek aýdanyna jańa ákim taǵaıyndaldy

2022 jylǵy 26 qyrkúıek, 13:00
Almaty oblysynyń Raıymbek aýdanyna jańa ákim taǵaıyndaldy

QONAEV. QazAqparat - Almaty oblysynyń ákimi Marat Sultanǵazıev Raıymbek aýdanynyń aktıvine jańa ákimdi tanystyrdy, dep habarlaıdy QazAqparat tilshisi.

QR Prezıdenti Ákimshiliginiń kelisimimen, aýdandyq máslıhattyń sheshimimen jáne Almaty oblysy ákiminiń ókimimen Berik Dúısenbev Raıymbek aýdanynyń ákimi bolyp taǵaıyndaldy.

Oblys ákimi Raıymbek halqyna arnaǵan sózinde óńirde júzege asýǵa tıis birqatar mindetterdi atap ótti.

Birinshi kezekte áleýmettik nysandar qurylysynyń barysy erekshe baqylaýǵa alynsyn degen pármen berdi.

Artynsha, aýdanda Kómirshi, Sarybastaý jáne Kókbel aýyldarynda úsh mekteptiń qurylysy júrip jatqanyn, sonymen qatar, Narynqol aýylynda 250 oryndyq emhananyń irgetasy qalanyp bastalǵanyn, shalǵaı alty aýylda medıtsınalyq mekemeler salynyp jatqanyn aıtty.

Sondaı-aq, oblys ákimi óńirdiń aýyl sharýashylyǵy salasyndaǵy jumys barysyna toqtaldy.

«Kartop ósirý baǵytyn damytý qajet. Ótken jyly aýdan dıqandary orta eseppen gektaryna 215 tsentner kartop jınady. Alaıda, saqtaý qoımalary 5,5 myń tonna ónimge eseptelgen, ónimdiligi - 130 myń tonna. Bul tek 4%. Ónimdi qaıta óńdeý qarastyrylmaǵan. Kóp jumys isteý kerek», - dep atap ótti Marat Sultanǵazıev.

Ósimdik sharýashylyǵymen qatar, óńirde mal sharýashylyǵyn damytýdyń úlken áleýeti bar, ol ınvestorlar úshin de qyzyqty. Osyǵan baılanysty, aýdannyń jańa ákimine bıznes qaýymdastyqpen jumysty jandandyrý qajet ekenide tilge tıek etildi.

Óńir basshysy paıdalanylmaı jatqan jerlerdi memlekettik menshikke qaıtarý boıynsha jumystar týraly da aıtty.

Aktıvpen kezdesýdi qorytyndylaı kele Marat Sultanǵazıev oblys ákimdigi tarapynan barlyq baǵyttar boıynsha jan-jaqty qoldaý kórsetiletinin aıtyp, jańa ákimge tabys tiledi.

Aıta keteıik, burynǵy aýdan ákimi Nurjan Qudaıbergenov Almaty oblysy ákiminiń orynbasary bolyp taǵaıyndaldy.

Berik Fatyquly 1981 jyly týǵan, bilimi joǵary. 2001 jyly Memlekettik sport jáne týrızm akademııasyn, 2020 jyly Qaraǵandy memelekettik ýnıversıtetin memlekettik jáne jergilikti basqarý mamandyǵy boıynsha bitirgen.

Eńbek ótili - 21 jyl.

Eńbek jolyn 2001 jyly Almaty qalasy Áýezov aýdanynyń №26 mektebinde muǵalim bolyp bastaǵan.

2011-2013 jyldary Qonaev qalasy Sheńgeldi aýylynda orta mekteptiń dırektory, 2013-2020 jyldary Zarechnyı aýyldyq okrýginiń ákimi, 2020-2021 jyldary Qonaev qalasy ákimi apparatynyń basshysy boldy.

2021 jyldan bastap osy ýaqytqa deıin Qonaev qalasy ákiminiń orynbasary laýazymyn atqarǵan.


Tegı:
Uqsas jańalyqtar
Seriktester jańalyqtary

Jańalyqtar