Almaty oblysynyń polıtsııa ǵımaratyn «bombalaǵan» er adam ustaldy
2022 jylǵy 17 tamyz 21:05

Almaty oblysynyń polıtsııa ǵımaratyn «bombalaǵan» er adam ustaldy

TALDYQORǴAN. QazAqparat - Taldyqorǵanda polıtsııa ǵımaratyna bomba qoıylǵany týraly jalǵan aqparat bergen er adam ustaldy, dep habarlaıdy QazAqparat Polisia.kz saıtyna silteme jasap.

«16 tamyz kúni Taldyqorǵannyń «102» shuǵyl jelisine oblystyq Polıtsııa departamentiniń ǵımaratyna jarylǵysh zat qoıylǵany týraly habarlama tústi. Dabyl boıynsha áreket etken saperler, kınologtar jáne ártúrli mamandar barlyq bólmelerdi, sonymen qatar jaqyn ornalasqan aýmaqty tekserdi. Habarlama jalǵan bolyp shyqty.

Osy aralyqta jedel bólimshelerdiń qyzmetkerleri jalǵan terrorısti shuǵyl anyqtap, ustap, ony qalalyq polıtsııaǵa jetkizdi», - delingen polıtsııa málimetinde.

Ustalǵan kúdikti Taldyqorǵan qalasynyń 44 jastaǵy turǵyny. Ol jasaǵan isine ókinetinin aıtyp, qala turǵyndarynan mundaı ázili úshin keshirim surady. «Mas bolyp, bomba týraly habarladym. Mas kúıimdegi áreketim úshin zań aldynda jaýap berýim kerek», – dedi ustalǵan er adam.
Polıtseıler terrorızm aktisi týraly kórineý jalǵan habarlaǵandar qylmystyq jaýapkershilikke tartylatynyn eske salady. Qoldanystaǵy zańnamada iri kólemde aqshalaı aıyppul, bas bostandyǵyn shekteý nemese bes jylǵa deıin bostandyǵynan aıyrý túrindegi jaza kózdelgen.



Foto: polisia.kz





Uqsas jańalyqtar
Seriktester jańalyqtary

Jańalyqtar

Úrdis

MURAǴAT