Almaty oblysynda parashıýt sportynan chempıonat bastaldy
2022 jylǵy 2 shilde 06:31

Almaty oblysynda parashıýt sportynan chempıonat bastaldy

TALDYQORǴAN. QazAqparat - Arnaıy operatsııalar kúshteriniń parashıýttik daıarlyq ortalyǵynda jeke-komandalyq birinshilikke klassıkalyq parashıýt sporty men toptyq parashıýt akrobatıkasynan Qazaqstan Respýblıkasy men Qarýly kúshterdiń 29-ashyq chempıonaty ótip jatyr, dep habarlaıdy QazAqparat.

Qorǵanys mınıstrliginiń málimetinshe, atalǵan saıysqa Arnaıy operatsııalar kúshteriniń, Desanttyq-shabýyldaý áskerleriniń, Áskerı-áýe kúshteriniń, Ulttyq ulannyń, «Otan» QB respýblıkalyq aeroklýbynyń, Qaraǵandy qalasynyń avıatsııalyq qutqarý-izdestirý ortalyǵynyń, Batys Qazaqstan oblysy Oral qalasynyń mamandandyrylǵan balalar-jasóspirimder sporttyq-tehnıkalyq mektebiniń komandalary qatysýda. Barlyǵy 17 komanda, olardyń ishinde halyqaralyq dárejedegi sport sheberleri, sport sheberleri men sheber ataǵyna úmitkerler, razrıadty sportshylar da bar.


«Qarýly kúshterdiń basshylyǵy áskerlerdiń jaýyngerlik daıarlyǵynyń tiregi sanalatyn áskerı-qoldanbaly sport túrlerin damytýǵa múddeli. Solardyń biri – parashıýt sporty. Chempıonat barysynda tıisti qaýipsizdik sharalary saqtalyp, joǵary deńgeıde ótedi dep senemin. Saıys ádil ótip, naǵyz myqtylar jeńiske jetsin», - dedi QRQK Arnaıy operatsııalar kúshteriniń qolbasshysy polkovnık Bolat Jorabaev.


Alǵashqy bolyp parashıýtpen sekirgen Arnaıy operatsııalar kúshteriniń qolbasshysy Bolat Jorabaev jarysty ashyp berdi.

Saıysta myqtylyǵyn synaýshylar qoný dáldigin belgilep, 900-1200 metr bıiktikten jeke jáne toptyq sekirýlerdi jáne 2200-2500 metr bıiktikten jeke jáne toptyq akrobatıkalyq sekirýler oryndaıdy.


Chempıonattyń qorytyndysyna sáıkes parashıýt sportynan Qazaqstan men Qarýly kúshterdiń qurama komandalary jasaqtalady.


Jańalyqtar

Úrdis

MURAǴAT