Almaty oblysynda qańtar oqıǵasynda vıdeoǵa túsip qalǵan 11 adam ustaldy
2022 jylǵy 5 sáýir 19:46

Almaty oblysynda qańtar oqıǵasynda vıdeoǵa túsip qalǵan 11 adam ustaldy

TALDYQORǴAN.QazAqparat - Qańtardaǵy dúrbeleń kezinde búlik shyǵarǵandardy Almaty oblysynyń polıtseıleri beınejazbaǵy dálelder arqyly jappaı ustap jatyr. Osylaısha uıaly telefon kadrlaryna túsip qalǵan 11 kúdikti qamaýǵa alyndy, dep habarlaıdy QazAqparat tilshisi.

Arnaıy ustaý operatsııasyn Almaty oblysyndaǵy Ulttyq qaýipsizdik komıteti men polıtsııa qyzmetkerleri uıymdastyrdy.

Olar kúdiktilerdi óńirdiń ár aýdan, aýyldarynda qolǵa túsirgen. Ustalǵan 11 adam - 20-39 jas aralyǵyndaǵylar.

Qazir olardyń ústinen «jappaı tártipsizdikti uıymdastyrý» baby boıynsha qylmystyq is qozǵalyp, tergeý júrip jatyr.

Oblystyń polıtsııa qyzmeti arnaıy jedel izdestirý operatsııasy kezinde Sarqan aýdanynda uıymdasqan qylmystyq toptyń bir múshesi de ustalǵanyn atap ótti.

Departamenttiń málimetinshe, qańtardaǵy oqıǵaǵa ol Sarqannan Taldyqorǵanǵa kelip qatysqan.

37 jastaǵy adamdy tintý kezinde odan Makarov tapanshasy men onyń oqtary, 210 gramm gashıshqa uqsas shóp tárkilengen.

Sarqan aýdanynyń turǵyny ustalǵannan keıin onyń týystary polıtsııa departamentine kelip, tergeýge kedergi jasamaq bolǵan.

«Qańtardaǵy jappaı tártipsizdikti uıymdastyrdy jáne oǵan qatysty degen 11 kúdikti ustaldy. Tintý kezinde eki ańshy myltyǵy, kóptegen oq-dári, quqyqtyq sharalar kezinde qoldanylatyn polıtsııanyń arnaıy quraldary tárkilendi. Olar - qalalyq jáne oblystyq polıtsııa ǵımaratynan urlanǵan zattar», - dedi Almaty oblystyq polıtsııa departamenti basshysynyń orynbasary Eldar Ábdikenov.


Seriktester jańalyqtary

Jańalyqtar

Úrdis

MURAǴAT