Almaty qalasynyń 2025 jylǵa deıingi damý jobasy talqylaýǵa usynyldy
2022 jylǵy 27 maýsym 10:55

Almaty qalasynyń 2025 jylǵa deıingi damý jobasy talqylaýǵa usynyldy

ALMATY. QazAqparat- «Almaty qalasyn damytýdyń 2025 jylǵa deıingi josparynyń negizgi basymdyqtary jáne 2030 jylǵa deıingi orta merzimdi perspektıvalary» atty jobasy talqylaýǵa usynyldy.

Qujat jobasy «Almaty qalasyn damytý ortalyǵy» AQ saıtynda jarııalandy, dep habarlaıdy QazAqparat tilshisi.

Qujatta qordalanǵan máselelerdi, halyqaralyq tájirıbeni, áleýmettik zertteýlerdiń nátıjelerin, Almatynyń tarıhı rólin, onyń mártebesin, ekonomıkalyq áleýetin jáne aǵymdaǵy ahýaldy eskere otyryp anyqtalǵan qalany damytýdyń qysqa jáne orta merzimdi basymdyqtary kórsetilgen.

Qujattyń mazmuny Almaty qalasyn damytýdyń 2025 jylǵa deıingi jospary men onyń 2030 jylǵa deıingi orta merzimdi perspektıvalary, Almatynyń 2040 jylǵa deıingi Bas jospary jáne Almaty aglomeratsııasyn 2030 jylǵa deıin damytýdyń keshendi jospary syndy jobalardy odan ári pysyqtaý men qabyldaý úshin negizge alynbaq.

Joba 7 bólimnen turady – «Jaıly qalalyq orta», «Turaqty ekonomıkalyq ósý», «Basqarylatyn ýrbanızatsııa», «Áleýmettik ornyqtylyq pen turaqtylyq», «Jasyl Almaty», «Smart sıtı», «Qaýipsiz qala».

Qujatta kórinis tapqan bastamalardy iske asyrý qalanyń úılesimdi keshendi damýyna qoljetkizýge múmkindik beredi, onyń basty maqsaty jaıly, ınklıýzıvti jáne qaýipsiz qalalyq orta qurý bolyp tabylady.

Qujatty ázirleýge túrli qyzmet salalarynan 40-tan astam táýelsiz sarapshy, onyń ishinde ekonomıster, ýrbanıster, ekologtar, qalany josparlaýshylar, aqparattyq tehnologııalar salasyndaǵy mamandar, qoǵam qaıratkerleri, kásipkerler jáne basqalar qatysty.

Jobany qoǵamdyq talqylaýǵa qalanyń árbir turǵyny qatysa alady, 7 bólimniń árqaısysy boıynsha pikir bildirip, oı bólisýge bolady. Jınalǵan derekter «Almaty qalasynyń 2025 jylǵa deıingi damý josparyn jáne onyń orta merzimdi perspektıvalaryn» talqylaý jáne pysyqtaý kezinde keshendi túrde óńdelip, paıdalanylatyn bolady.

Sondaı-aq, saıtta qujatqa siltemeni áleýmettik jelilerde jáne messendjerlerde bólisý múmkindigi qarastyrylǵan.

Qujat 1 shildege deıin jalpy talqylaýda bolady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT