Almaty ákimi ózin samokat qaǵyp kete jazdaǵanyn aıtty
2022 jylǵy 23 maýsym 17:36

Almaty ákimi ózin samokat qaǵyp kete jazdaǵanyn aıtty

ALMATY. QazAqparat - Almaly aýdanynyń turǵyny qala ákimi Erbolat Dosaevtan moped, elektrosamokatta júrý tártibine qatysty sharalar qabyldanýdy surady, dep habarlaıdy QazAqparat tilshisi.

Qala ákiminiń kezdesýine kelgen Almaly aýdany turǵynynyń aıtýynsha, kámeletke tolmaǵandar eki dońǵalaqty kólikti jıi qoldanady jáne jol erejesin saqtamaıdy. Saldarynan jol apattary oryn alady.

Ákim moped, elektrosamokat, monodóńgelek sekildi kólik quraldary kóktem bastalǵaly kúndelikti máselelerdiń birine aınalǵanyn aıtty.

«Ókinishke qaraı, mopedter bizdiń elde kólik bolyp sanalmaıdy, olar elektr qozǵaltqyshy bar velosıpedke jatady. Sondyqtan búginde QR Іshki ister mınıstrligi samokat pen mopedterge qatysty jol qozǵalysyn retteýge arnalǵan zań jobasyn ázirleýde. Máslıhatqa tapsyrma berdim, bálkim, qalada ózimiz retteıtin shyǵarmyz, biraq zańnamalyq baza kerek», - dedi ákim.

Erbolat Dosaev samokattardy eresekterge nemese jol qozǵalysy erejelerin saqtaýǵa múmkindigi bar adamdarǵa berý úshin ákimdik samokat operatorlarymen jumys istep jatqanyn aıtty.

«Meni de samokat qaǵyp kete jazdady. Qalany jaıaý aralaýǵa shyqqan edim. Іshki ister mınıstrligi zańnamalyq bazany daıyndap jatyr. Ol ýaqytqa deıin mopedti jalǵa beretin iri operatorlarmen jumys isteýge tyrysamyz», - dedi shahar basshysy.

Buǵan deıin Terrenkýrde elektrosamokatpen júrgenderdiń jazalanatyny týraly jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT