Jańalyqtar  >
Álıhan Smaıylov óńdeý sektoryndaǵy kásiporyndardy qoldaý sharalaryn keńeıtýdi tapsyrdy
2022 jylǵy 11 tamyz 10:56

Álıhan Smaıylov óńdeý sektoryndaǵy kásiporyndardy qoldaý sharalaryn keńeıtýdi tapsyrdy

NUR-SULTAN. QazAqparat - QR Premer-Mınıstri Álıhan Smaıylov mashına jasaýdy damytý máseleleri jóninde keńes ótkizdi, dep habarlaıdy QazAqparat Úkimettiń resmı saıtyna silteme jasap.

Indýstrııa jáne ınfraqurylymdyq damý mınıstri Qaıyrbek Óskenbaev óz baıandamasynda 2022 jyldyń 6 aıynyń qorytyndysy boıynsha mashına jasaý óndirisi ótken jyldyń sáıkes kezeńimen salystyrǵanda 37%-ǵa (aqshalaı balamada) óskenin habarlady. Salaǵa tartylǵan ınvestıtsııalar kólemi 23%-ǵa ulǵaıdy.

Keńes barysynda «Qazaqstan mashına jasaýshylar odaǵy» ZTB basqarma tóraǵasy Meıram Pishembaev otandyq óndiristi qoldaýdyń birqatar baǵyttary boıynsha sala ókilderiniń usynystaryn aıtty.

Óńdeý sektorynyń kásiporyndaryn qoldaý boıynsha jumys sheńberinde shıkizat, materıaldar men quramdas bólshekterdi ımporttaý kezinde esepke jatqyzý ádisimen qosylǵan qun salyǵyn tóleý tetigin qoldaný 2024 jylǵa deıin uzartylǵany atap ótildi. Bul rette ınvestıtsııalyq jobalardy iske asyrý úshin qajetti metall ónimderin QQS osy ádispen tólenetin ımporttalatyn taýarlar tizbesine qosý usynyldy. Sondaı-aq ónimdi eksporttaý kezinde QQS-ny jedel qaıtaratyn óńdeýshi sektor kásiporyndaryn qamtýdy keńeıtý usynylady.

Premer-Mınıstr atalǵan usynystardy qoldap, tıisti memlekettik organdarǵa qajetti sheshimderdiń jobalaryn engizýdi tapsyrdy.

«Biz otandyq óndiristiń ósip, órkendeýine múddelimiz. Ol úshin qoldaý sharalarymen qamtý keńeıtiletin bolady. Sondaı-aq satyp alýlar kezinde jergilikti qamtýdy ulǵaıtý máselelerine erekshe nazar aýdarý qajet», — dedi Álıhan Smaıylov.

Premer-Mınıstr osy baǵyttar boıynsha tıisti memlekettik organdarǵa birqatar tapsyrmalar berdi.

Foto: primeminister.kz





Uqsas jańalyqtar
Seriktester jańalyqtary

Jańalyqtar

Úrdis

MURAǴAT