Jańalyqtar  >

Álıhan Smaıylov quzyrly organdarmen Reseıden kelýshiler sanynyń artýyn talqylady

2022 jylǵy 26 qyrkúıek, 21:33
Álıhan Smaıylov quzyrly organdarmen Reseıden kelýshiler sanynyń artýyn talqylady

ASTANA. QazAqparat - QR Premer-Mınıstri Álıhan Smaıylov kóshi-qon máseleleri jóninde keńes ótkizdi. Onda Reseı Federatsııasynan kelýshiler sanynyń artýyna qatysty qalyptasyp otyrǵan ahýal talqylandy, dep habarlaıdy QazAqparat primeminister.kz saıtyna silteme jasap.

Kelip jatqan adamdardy óńirlerge ornalastyrý, olardyń jumysqa turý yqtımaldyǵy jáne konsýltatsııalyq qyzmet máseleleri boıynsha Eńbek jáne halyqty áleýmettik qorǵaý mınıstri Tamara Dúısenova, mıgranttardy tirkeý jáne quqyqtyq tártipti qamtamasyz etý máseleleri jóninde Іshki ister mınıstri Marat Ahmetjanov, arendalyq turǵyn úı naryǵynyń quqyqtyq aspektileri týraly Ádilet mınıstri Qanat Mýsın baıandady.

Keńeske Ǵylym jáne joǵary bilim mınıstri Saıasat Nurbek, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, Batys Qazaqstan oblysynyń ákimi Ǵalı Esqalıev jáne Almaty qalasynyń ákimi Erbolat Dosaev qatysty.

Premer-Mınıstr óńirlerde áleýmettik shıeleniske jol bermeý úshin ortalyq jáne jergilikti memlekettik organdardyń is-qımylyn úılestirýdi kúsheıtý qajettigin atap ótti.

«Eldegi quqyqtyq tártip pen qaýipsizdikti qamtamasyz etý jónindegi jumysty kúsheıtý, sondaı-aq kelip jatqan reseılikterge járdem kórsetý kerek: EAEO zańnamasyna sáıkes olardy ýaqytyly tirkep, eńbekpen qamtý máselelerin qarastyrý qajet. Bul oraıda jalǵa beriletin turǵyn úı naryǵyndaǵy ahýaldy turaqtandyrý boıynsha sharalar qabyldaý mańyzdy», — dedi Álıhan Smaıylov.

Onyń aıtýynsha, barlyq memlekettik qurylymdar óz quzyreti aıasynda otandastarymyzǵa da, mıgranttarǵa da taraptardyń quqyqtary men jaýapkershiligine baılanysty túsindirý jumystaryn júrgizýi qajet. Aldaǵy kúnderi bul maqsatta jedel jeliler ashylady.

Sonymen qatar Premer-Mınıstr ýaqytsha kelgen shetel azamattaryn jumysqa ornalastyrý kezinde eńbek zańnamasynyń saqtalýyna baqylaýdy kúsheıtýdi tapsyrdy.

Oǵan qosa, Premer-Mınıstr barlyq kólik ınfraqurylymynyń turaqty jumys isteýin qamtamasyz etýdi, elge kelip jatqan adamdardyń bir jerde shoǵyrlanýyn boldyrmaý jóninde qajetti sharalar qabyldaýdy, HQKO-lardyń úzdiksiz jumys isteýi úshin qosymsha qyzmet kórsetý terezelerin ashýdy tapsyrdy.


Foto: primeminister.kz


Uqsas jańalyqtar
Seriktester jańalyqtary

Jańalyqtar