Álıhan Smaıylov: Aldymyzda turǵan eń mańyzdy máseleniń biri – makroekonomıkalyq turaqtylyq
2022 jylǵy 21 qańtar 19:28

Álıhan Smaıylov: Aldymyzda turǵan eń mańyzdy máseleniń biri – makroekonomıkalyq turaqtylyq

NUR-SULTAN. QazAqparat - Úkimet iri bıznes ókilderimen ózara birlesip jumys isteýge qashan da daıyn. Bul týraly búgin QR Premer-Mınıstri Álıhan Smaıylov Memleket basshysynyń otandyq bıznes ókilderimen kezdesýinde aıtty, dep habarlaıdy QazAqparat tilshisi.

«Іri kásipkerliktiń Qazaqstan ekonomıkasyndaǵy úlesi 48 paıyzdy quraıdy. Sondyqtan osy bıznes segmentiniń jaýapkershiligi de óte zor. Úkimet bıznestiń, onyń ishinde iri bıznestiń de damýyna qolaıly jaǵdaı jasaý úshin tıisti sharalardy qabyldaıdy. Qazirgi tańda jahandy jaılaǵan daǵdarystan keıingi bizdiń aldymyzda turǵan eń mańyzdy máseleniń biri – makroekonomıkalyq turaqtylyqty qamtamasyz etý», - dedi ol.

Premer-Mınıstr Úkimet pen Ulttyq banktiń birlesken saıasaty osy maqsatqa baǵyttalatyndyǵyn basa aıtty.

«Bul rette, eń kúrdeli máseleniń biri – ol ınflıatsııa deńgeıin tómendetý», - dedi Álıhan Smaıylov.

Ol Prezıdent tapsyrmasyna sáıkes Úkimet tıisti jedel sharalarmen birge, júıeli sharalardy da iske asyratynyn atap ótti.

«Birinshi kezekte, bul – aýylsharýashylyq ónimderin óndirý, azyq-túlikpen ishki naryqty tolyqtyrý jáne azyq-túlik qaýipsizdigin qamtamasyz etý. Mezgilaralyq kezeńde ınflıatsııa qysymy men syrtqy faktorlardyń áserin tómendetý úshin tıisti logıstıka júıesin qurý óte mańyzdy. Іri kásipkerlerdi osy jumysqa qatysýǵa shaqyramyz. Úkimet iri bıznes ókilderimen ózara birlesip jumys isteýge qashan da daıyn ekenin aıtqym keledi», - dedi Úkimet basshysy.


Jańalyqtar

MURAǴAT