Áleýmettik máseleler Májilis depýtattarynyń nazarynda
2022 jylǵy 4 shilde 21:43

Áleýmettik máseleler Májilis depýtattarynyń nazarynda

NUR-SULTAN. QazAqparat - Almaty oblysyna jumys saparymen barǵan Parlament Májilisiniń depýtattary, «AMANAT» partııasy fraktsııasynyń músheleri Maqpal Tajmaǵambetova men Janna Telpekbaeva Qonaev qalasyndaǵy 900 oryndyq mektep qurylysymen tanysty, dep habarlaıdy QazAqparat Palatanyń baspasóz qyzmetine silteme jasap.

«Bul nysannyń qurylys jumystaryna «Eńbek» baǵdarlamasy arqyly 150 adam jumysqa tartylǵan. Qurylys jumystaryna tolyqtaı otandyq ónimderdi qoldanyp jatyrmyz. Sondaı-aq, ǵımarat kelesi jyly tolyǵymen paıdalanýǵa beriledi», - dedi merdiger Bekzat Moldabekov.

Qurylys jumystaryn aralap kórgen Májilis depýtattary birqatar máselelerge nazar aýdardy.

«Merdigerler mektepti ýaqytynda aıaqtaýy tıis. Árıne, birinshi kezekte mekteptiń qurylysy joǵarǵy deńgeıde bolsa deımiz. Sonymen birge, sapaly qural-jabdyqtarmen qamtamasyz etilýin, barlyq standarttarǵa saı bolýyn, ıaǵnı qural-jabdyqtarǵa, zerthanalardyń durys ornalasýyna da baqylaý qajet», - dedi Maqpal Tajmaǵambetova.

Sonymen qatar, depýtattar qala ákimshiligine salynyp jatqan nysannyń sapasyna erekshe mán berýdi tapsyrdy jáne sala basshylarynyń ótinishterine qulaq túrip, bilim salasyndaǵy máselelerdi nazarǵa alatyndaryn jetkizdi. Bilim mekemelerinde sanıtarlyq quraldardyń tolyq bolýy men talaptardyń qatań saqtalýy keregin eskertti.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT