Áleýmettik qyzmet portaly arqyly 360 myńnan astam múgedek jan kómek aldy
2021 jylǵy 30 jeltoqsan 12:05

Áleýmettik qyzmet portaly arqyly 360 myńnan astam múgedek jan kómek aldy

NUR-SULTAN. QazAqparat – Bıyl elimizde áleýmettik qyzmetter portaly kómegimen 360 myńnan astam múgedek janǵa qyzmet usynyldy, dep habarlaıdy QazAqparat tilshisi QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

«Elimizde múgedek jandardyń quqyǵyn qorǵaý jáne ómir súrý sapasyn jaqsartý jónindegi ulttyq jospardy iske asyrý sheńberinde áleýmettik qyzmet portaly iske qosyldy. Jáne ol 2025 jylǵa deıin kezeń-kezeńimen engiziledi. Sondaı-aq, portal qoldanýshyǵa ońaltýdyń tehnıkalyq quraldary men qyzmetin derbes tańdaýǵa múmkindik beredi. Kez kelgen qyzmetke qol jetkizý úshin aldymen elektrondyq tsıfrlyq qoltańbany rastaý talap etiledi. Sol sııaqty qyzmetti alý merzimin 6 aıdan 15 kúnge deıin qysqartty. Qoldanýshylardyń máselesin jyldam sheshý úshin eńbek resýrstaryn damytý ortalyǵymen tikeleı baılanys qurylǵan», - delingen habarlamada.

Sondaı-aq, bıyl 7 shildeden bastap ótinishterdi qabyldaıtyn 1414 nómirli call ortalyǵy iske qosyldy.

«Turǵyndardan qońyraýlar tegin qabyldanady. Baılanys ortalyǵyna kelip túsken portal jumysyna qatysty suraqtar men usynystarǵa ortalyq mamany óńdep oǵan jaýap beredi. Jalpy bıyl áleýmettik qyzmetter portaly arqyly 360 myńnan astam múgedek jan qyzmet aldy. Odan bólek, jyl basynan beri 266 myńnan astam múgedektigi bar adam atalǵan portal arqyly ońaltýdyń tehnıkalyq quraldary, 6 myńnan astam ymdaý tili qyzmeti, 33 myńnan astam jeke kómekshiniń qyzmetin, 55 myńǵa jýyq jan shıpajaıda em aldy. Búginde portalda arnaýly áleýmettik qyzmet kórsetetin 795 medıtsınalyq-áleýmettik mekeme tirkelgen», - deıdi atalǵan vedomstvodan.


Jańalyqtar

MURAǴAT