Álemniń birinshi raketkasy Danııl Medvedev Astana Open týrnırinde oınaıdy
2022 jylǵy 24 maýsym 07:13

Álemniń birinshi raketkasy Danııl Medvedev Astana Open týrnırinde oınaıdy

NUR-SULTAN. QazAqparat - Álemniń birinshi raketkasy, reseılik Danııl Medvedev Astana Open ATP 250 týrnırine qatysatynyn rastady, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, bıylǵy doda elordada 18-25 qyrkúıek aralyǵynda ótedi.

D.Medvedev - 2021 jylǵy AQSh ashyq chempıonatynyń, 2020 jylǵy ATP qorytyndy jarysynyń jeńimpazy. Sondaı-aq ol úsh ret «Úlken dýlyǵa» týrnırleriniń fınalyna deıin jetti.

«Danııl Medvedevtiń bıyl úshinshi ret ótkeli otyrǵan Astana Open dodasyna keletinine qýanyshtymyz. Qazaqstanda Rafael Nadal, Novak Djokovıch, Jo-Vılfrıd Tsonga syndy álemniń úzdik tennısshileriniń óner kórsetýi ıgi dástúrge aınalyp keledi. Danııl óziniń sporttaǵy jolyn bizdiń elimizde bastaǵan. Qazaqstan tennıs federatsııasynyń prezıdenti Bolat Ótemuratovtyń oıynshymen qarym-qatynasy jaqsy, bul ony osy jarysqa shaqyrýǵa múmkindik berdi. Endi álemniń birinshi raketkasy elordadaǵy Ulttyq tennıs ortalyǵynda óner kórseter kún de jaqyn», dedi Qazaqstan tennıs federatsııasynyń vıtse-prezıdenti ıÝrıı Polskıı.

«Men Astana Open týrnırine qatysatynyma qýanyshtymyn. Munda maǵan deıin de ataqty oıynshylar kelgen eken. Dodany asyǵa kútemin», dedi D.Medvedev.

Reseılik tennısshi 2010 jyly 18 jasqa deıingiler arasynda Óskemende ótken ITF Juniors G3 týrnırine qatysqan. Al 2016 jyly álemniń 171-raketkasy retinde ATP Challenger serııasyna enetin QR Prezıdenti kýbogyna kelgen. Onda shırek fınalda ózbekstandyq Denıs Istomınge jol bergen.

Eske sala keteıik, budan buryn Mıhaıl Kýkýshkınniń Ýımbldonda onynshy ret óner kórsetetinin jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT