+7 (701) 759 90 19
USD 425.48 EUR 494.2
RUB 6.14 CNY 66.67
Jańalyqtar

Alapat órtpen arpalysqan qutqarýshy: Kıimimiz janyp, kaskamyz balqysa da damyl tappadyq

2021 jylǵy 13 mamyr 18:43
Bólisińiz:
Alapat órtpen arpalysqan qutqarýshy: Kıimimiz janyp, kaskamyz balqysa da damyl tappadyq

ÓSKEMEN. QazAqparat – Kesheli beri áleýmettik jelilerde qyzyl jalynmen 2 kún boıy damylsyz kúresken órt sóndirýshilerdiń ábden qaljyryp, uıqyǵa bas qoıǵan vıdeosy tarap jatyr. Jurttyń júregin eljiretken osy vıdeodaǵylardyń biri – №14 órt sóndirý bólimshesi bastyǵynyń orynbasary Ulan Nurmuhambet. QazAqparat tilshisi azamattyq qorǵanys aǵa leıtenantymen suhbattasyp, talaıdy tyǵyryqqa tiregen tilsiz jaýmen qalaı kúreskenderin surap kórdi.

Uqsas jańalyqtar
Aqtóbede qoqys polıgony órtenip, aýaǵa azot dıoksıdi tarady Aqmola oblysynda mektepten órt shyqty Shyǵys Qazaqstanda bir kúnde 5 órt shyqty

- Qutqarýshylardyń qataryn tolyqtyrǵanyńyzǵa qansha jyldyń júzi boldy?

- 1990 jyly 10 aqpan kúni Shyǵys Qazaqstan oblysy Katonqaraǵaı aýdany Topqaıyń aýylynda jaryq dúnıe esigin ashtym. 2012 jyly Otan aldyndaǵy boryshymdy elordadaǵy 36-shy desanttyq-shabýyl brıgadasynda ótedim. Áskerden kelgennen keıin Rıdder qalasyndaǵy №1 mamandandyrylǵan órt sóndirý bólimine jumysqa ornalastym. Bul 2013 jyldyń qańtar aıy bolatyn. 4 jarym jyldaı órt sóndirýshi bolyp ter tókkennen keıin Aqtóbe qalasynda 3 aılyq ofıtserlik kýrsqa baryp bilim aldyq. Osydan keıin qaraýyl bastyǵy bolyp, keıinnen bólim bastyǵynyń orynbasary qyzmetine taǵaıyndaldym. Qazirgi ýaqytta №14 órt sóndirý bólimi bastyǵynyń orynbasary bolyp eńbek etip kelemiz.

- Ormanda shyǵyp, jer úılerge taraǵan alapat órtpen qalaı kúreskenderińizdi aıtyp berseńiz.

- Órt 10 mamyr kúni tús kezinde Rıdder orman sharýashylyǵynda shyqty. Negizinen bul №1 mamandandyrylǵan órt sóndirý bólimine qarasty aýmaq. Sol bólimniń qutqarýshylary tilsiz jaýdyń betin qaıtara almaǵandyqtan bizden kómek surady. Saǵat 14.30 shamasy. Bólimdegi jigitter kólikke minip, shuǵyl attandy. 15.00-ge qaraı ózim de oqıǵa ornyna jettim. Ol kezde jalyn jer úılerge tarap ketken. Sosnovyı bor kóshesindegi otqa oranǵan 4 úıdi kórdim. Jel soǵyp tur. Aınalany túgel tútin tumshalap alǵan. Esikterdi qaǵyp halyqqa «Syrtqa shyǵyńdar! Órt kele jatyr!» dep aıqaıladyq. Jigitterge «jalyndy kósheniń sol jaǵyna shyǵarmańdar» dep tapsyrma berdim. Órtti ustap turý qıynǵa soqsa da bul mindet sátti oryndaldy.

Kenet turǵyndardyń biri «Úıden shyqpaımyn! Garajda júk kóligim tur. Onsyz eshqaıda da barmaımyn» dedi. Al túsindirip kór! Qansha aıtsaq ta tyńdar emes. Sodan soń kólikti qaýipsiz jerge alyp shyqtyq. Órtpen kúres bir sátke de toqtamady. Úılerden 10-ǵa jýyq gaz ballonyn syrtqa shyǵaryp úlgerdik. Qutqarýshylardyń kıimderi janyp, kaskalary balqyp, bir birine sý shashty. Birazdan soń Óskemen qalasynan qosymsha kúsh kelip jetti. «Kaztsınk», «Vodokanal» mekemeleriniń sý tasýshy kólikteri de jumyldyryldy.

- Osyndaı syn saǵatta eń áýeli ne oıladyńyz?

- Shynymdy aıtsam, oılanýǵa ýaqyt bolmady. Tek áreket. Tilsiz jaýmen teketireste ár sekýndtyń mańyzy zor. Órttiń órshýi – qas-qaǵymda. Ákem orman sharýashylyǵynda ormanshy bolyp jumys isteıdi. Keıinnen jalynnyń beti qaıta bastaǵan kezde eń áýeli «ákem aman-esen be eken, birdeńe bolyp qalmasa ıgi edi» degen oı sanamda sarnap qoıa berdi.

- Kúndiz-túni órtpen kúreskende múlde nár tatpadyńyzdar ma?

- Úıler otqa oranyp jatqanda as iship otyrmaısyń ǵoı. Arasynda tamaǵymyzdy jibitý úshin sý urttap qoıamyz. Tún jarymynda da esh toqtaýsyz órtti óshirýmen boldyq. Tek kelesi kúni túske qaraı jalyndy jeńip bolǵan soń jergilikti atqarýshy organ qyzmetkerleri men volonterler ákelgen tamaqtan dám tattyq. Ábden qaljyrap, qol-aıaǵymyz syzdap tur. Bir jaǵynan uıqy da qysyp barady. Sóıtip, 20 mınýttaı myzǵyp aldyq. Mine, osy kezde bizdi vıdeoǵa túsirip alyp, jelige júktep jiberipti. Ony artynan estidik. Kim túsirgenin bilmeımin. El-jurttyń rızashylyqtaryn bildirip, alǵystaryn jaýdyryp jatqanyn kórgende keýdemizdi qýanysh kernep, bul salaǵa beker kelmegenimizdi túsingendeımiz.

- Otbasyńyz jaıly aıtyp ótseńiz?

- Áıelim, eki balam bar. Qudaı qosqan qosaǵym Aıdana Rıdderdegi №1 mamandandyrylǵan órt sóndirý bóliminde feldsher bolyp jumys isteıdi. Ulym Islam 4 jasta, al qyzym Asylym 2-ge toldy.

- Ulyńyz óskende órt sóndirýshi bolǵysy keletindigin aıtsa qoldar ma edińiz?

- Árıne, qoldaımyn. Adam ómirin alǵash qutqarǵan kezde erekshe sezimde bolady ekensiń. Buny sózben aıtyp jetkizý múmkin emes. Osy ómirge bosqa kelmegenińdi sezip, óz ornyńdy tapqanyńdy túısinesiń. Balamnyń mańdaıyna da sol bir ekiniń birine buıyrtpaıtyn erekshe áserge bólenýdi jazsa qalaı qarsy bolaıyn? Oǵan árkez aqylymdy aıtyp, qoldaý kórsetýge ázirmin.

- Áńgimeńizge kóp rahmet!


Bizdiń kanalymyzǵa jazylyńyz:

Bólisińiz:

Avtor:

Talǵatjan Muhametbekuly

Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT