Alakóldegi alapat órtten 17 ǵımarat janyp ketti - mınıstrlik
2022 jylǵy 5 shilde 12:25

Alakóldegi alapat órtten 17 ǵımarat janyp ketti - mınıstrlik

NUR-SULTAN. QazAqparat – Alakóldegi órtten 4 demalys ornyndaǵy 17 ǵımarat tolyǵymen janyp ketti. Qyzyl jalyn 3 myń sharshy metr aýmaqty sharpyǵan. Bul týraly Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat tilshisi.

«Órttiń naqty shyǵý sebebi áli anyqtalmaǵan. Negizgi órt shyqqan ǵımarat – «Kerýen» demalys úıi. 4 demalys ornyndaǵy 17 ǵımarat tolyǵymen janyp ketti. Dál qazirgi ýaqytta órt sóndirilgen. Demalys ortalyqtarynda gıdrokran ornatylmaǵan. Sý jaqyn bolǵandyqtan, oǵan eshqandaı qajettilik týyndamady. Sýdyń jetispeýshiligine baılanysty másele bolǵan joq. Tek materıaldar tez tutanǵysh bolǵan soń órt jedel tarap ketti. 3 myń sharshy metr aýmaqqa jaıyldy», - dedi mınıstrliktiń resmı ókili.

Talǵat Ýálıdiń málimetinshe, negizgi kúsh kelgenge deıin tilsiz jaýdy demalys ornynda ornalasqan ýaqytsha órt sóndirý beketteriniń kómegimen aýyzdyqtaýǵa tyrysqan.

Al eń jaqyn jerde ornalasqan negizgi órt sóndirý beketi 150 shaqyrym jerdegi aýdan ortalyǵynda bolǵan.

Sondaı-aq, mınıstrlik ókili «demalýshylar órtti tolyq ózderi sóndirdi» degen áleýmettik jelide taraǵan aqparattyń shyndyqqa janaspaıtynyn málimdedi.

«Birinshi kezekte bizdiń ýaqytsha órt sóndirý beketteri jumysqa kiristi. Degenmen ol jerlerde demalýshylar kómektesti. Ózderiniń, balalarynyń qaýipsizdigi úshin qolushyn sozdy. Biraq qyzyl jalyndy tolyǵymen demalýshylar aýyzdyqtady degen shyndyqqa janaspaıdy. Alaıda, shet qalmaı kómektesken demalýshylarǵa alǵys aıtamyz. Polıtsııa oqıǵa ornyna jetkennen keıin sol jerdegi adamdardy qaýipsiz jerge kóshirildi. Demalys ornynda qansha týrıst bolǵany áli anyqtalyp jatyr», - dep túsinik berdi Talǵat Ýálı.

Talǵat Ýálı qazir óńirde arnaıy komıssııa qurylyp, shyǵyn eseptelip, órttiń saldaryn joıý jumysy júrgizilip jatqanyn jetkizdi.

Onyń aıtýynsha, órt kezinde qujaty men múlki janyp ketken demalýshylar arnaıy organdarǵa aryz jazý arqyly shyǵynyn óndirip ala alady.

Eske sala keteıik, keshe Abaı oblysy Úrjar aýdanynda Alakól jaǵasyndaǵy demalys bazasynda bolǵan órttiń 5 saǵat boıy sóndirilgenin, 7 adam zardap shekkenin jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT