«Aqjaıyq» fýtbol klýbyna jańadan bes oıynshy alyndy
2022 jylǵy 30 maýsym 22:50

«Aqjaıyq» fýtbol klýbyna jańadan bes oıynshy alyndy

ORAL. QazAqparat – Premer-lıgada óner kórsetetin «Aqjaıyq» fýtbol klýbyna jańadan bes oıynshy alyndy, dep habarlaıdy QazAqparat tilshisi.

«Aqjaıyq» fýtbol klýbynyń baspasóz qyzmetinen málim etkenindeı, bes sheteldik oıynshymen kelisimshartqa qol qoıyldy.

Belorýssııalyq qaqpashy Rodıon Sıamýktiń tájirıbesi mol, 33 jasta. Ol birqatar Belarýs komandalarynda, sondaı-aq Polshanyń «Rolko», Reseıdiń «Tambov» klýbynda oınady. «Torpedo-BelAZ» (Jodıno) quramynda 2020 jylǵy Belarýs chempıonatynyń qola júldegeri atandy. Bıyl «Dınamo-Brest» qaqpasynda 8 match ótkizip, 13 dop jiberip aldy.

Grýzııalyq shabýylshy Toma Tabatadze latvııalyq «Olımp» quramynda sporttyq jolyn bastady. Lıtva, Túrkııa klýbtarynda dop tepti. Sońǵy komandasy – grýzııalyq «Sıonı» quramynda 31 oıynda 8 gol soǵyp, 13 nátıjeli pas berdi.

Reseılik jartylaı qorǵaýshy Aleksandr Výlfov – máskeýlik «Lokomotıvtiń» túlegi. Reseıdiń birneshe klýbynda oınaǵan onyń sońǵy komandasy – «Veles» (34 match).

Ýkraınalyq Ilıa Kovalenko negizinen óz elinde jasyl alańǵa shyqty. «Aqjaıyqqa» aýysar aldynda úsh aı lıtvalyq «Ekranasqa» jalǵa berilgenimen, onda oınaǵan joq.

Serbııalyq shabýylshy Djordje Ivkovıch slovenııalyq «Galeb Ankaran» klýbyn aıtpaǵanda, basqasynda tek óz otanynda dop tepti. Oralǵa Belgradtyń IMT klýbynan keldi.

Bıylǵy maýsymda súreńsiz oıyn kórsetip, 13-orynda kele jatqan «Aqjaıyq» osynyń aldynda tórt birdeı sheteldik fýtbolshymen qosh aıtysqan edi.

Eske sala keteıik, budan buryn «Aqjaıyq» jáne «Aqtóbe» fýtbol klýbtarynyń dırektorlary qyzmetinen ketkenin jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT