Aqtóbeniń shalǵaı aýylynda 100 oryndy mektep ashyldy
2022 jylǵy 24 qańtar 01:53

Aqtóbeniń shalǵaı aýylynda 100 oryndy mektep ashyldy

AQTÓBE. QazAqparat - Aqtóbe oblysy Baıǵanın aýdany Jańatań aýylynda 100 oryndy mektep ashyldy, dep habarlaıdy QazAqparat tilshisi.

Jańatań aýylyndaǵy mekteptiń qurylysyna 452 mln teńgeden astam qarjy jumsaldy. Baıǵanın aýdanynyń ákimi Qaırat Otarov oblys ákimi Ońdasyn Orazalınge aýdannyń áleýmettik-ekonomıkalyq damýy jaıynda baıandap aldaǵy jyldyń mindetterin atady.

«Aýdanda Memleket basshysynyń mindetteri men sizdiń jumys saparyńyz barysynda bergen tapsyrmalaryńyzdy
oryndaý sharalary qabyldanýda. Atap aıtqanda, 2023 jylǵa qaraı turǵyndardy sýmen 100% qamtýdy josparlap otyrmyz. Bıyl aýyldy 13 sýmen qamtý, 5 gazben qamtý jobalary júzege asyrylmaq. Birneshe eldi mekende sport kesheniniń, medıtsınalyq pýnkt pen dárigerlik ambýlatorııanyń qurylysy júrgizilip jatyr. Byltyr úsh orta mektep kúrdeli jóndeýden, 17 mektep shaǵyn jóndeýden ótti. 2022 jyly Saǵyz orta mektebin kúrdeli jóndep, Oımaýyt aýylynda S.Jıenbaev atyndaǵy 150 oryndyq orta mekteptiń qurylysy aıaqtalady dep kútilip otyr. 2,4 mlrd teńgege 17 jol jobasyn júzege asyrýdy josparlap otyrmyz»,- dedi Qaırat Otarov. Sapar kezinde aımaq basshysy Jańatań aýylynyń turǵyndarymen júzdesip, ótinish tilekterin tyńdady. Saýaldaryna jaýap berdi.
Ońdasyn Orazalın: «Óńir ekonomıkasy turaqty damyp keledi, memleket tıisti qoldaýdy kórsetýde. Ózekti suraqtardyń biri gazdandyrýǵa baılanysty boldy, biraq ol da sheshiledi. Biz sizderdi tyńdap, usynystaryńyzdy múmkindiginshe qoldaýǵa daıynbyz. Áleýmettik nysandar salý, halyqtyń ómir sapasyn kóterýge jaǵdaı jasaý - bizdiń mindetimiz, eńbektený, tabysty kóterip, óskeleń urpaqqa laıyqty tárbıe berý - sizderdiń mindet»- dep sózin túıindedi.
Jumys baǵdarlamasy aıasynda Ońdasyn Orazalın «Murat» sharýa qojalyǵyna da bardy.
Qojalyq basshysy Erbol Tasymov mal sharýashylyǵymen 2020 jyldan beri aınalysatynyn aıtty. 3450 gektar jaıylymy, 139 bas iri qara, 35 bas usaq mal on jylqysy bar. Byltyr qojalyq sýbsıdııa alyp, memlekettiń 17,3 mln. teńge kólemindegi qoldaýyn paıdalandy. Sol qarajatqa arnaıy tehnıkalar jańartyldy. Tamshylatyp sýarýǵa, sútti mal sharýashylyǵyn damytýǵa jáne sút fermasyn ashýǵa sýbsıdııa alý josparda bar.
«Memlekettik qoldaý sharalarynyń arqasynda men asyl tuqymdy buqalar, jem-shóp satyp alý úshin sýbsıdııa ala aldym, traktor satyp aldym, sý alý úshin uńǵyma burǵylaýǵa kómek jáne t.b.
aldym. Qazir men et baǵytyn damytyp jatyrmyn, sút baǵytyndaǵy jumysty bastaǵym keledi. Soǵan baılanysty sharýa qojalyǵyn elektrlendirýge qoldaý kórsetýdi suraımyn»,- dedi Erbol Tasymov oblys ákimine.
Óńir basshysy Baıǵanın aýdany men aýyl sharýashylyǵy basshylyǵyna osy suraqty qarap, ony sheshý úshin «Bıznestiń jol kartasy» baǵdarlamasy aıasynda barlyq tıisti kómekti kórsetýdi tapsyrdy.


Jańalyqtar

MURAǴAT