Aqtóbede jyl basynan beri 90 balanyń júregine ota jasalǵan

AQTÓBE. QazAqparat – Aqtóbege Ulttyq ǵylymı medıtsına ortalyǵynyń dárigerleri kelip, júreginde aqaýy bar 70 balany qarap shyqty, dep habarlaıdy QazAqparat tilshisi.

Uqsas jańalyqtar

Júregińdi saqta: Júrek aýrýlary, ota jasaý jáne kardıolog keńesteri

Týabitti júrek aqaýymen ómirge kelgen balalarǵa jyl basynan beri aqtóbelik dárigerler 90 ota jasady. Onyń 70-i ashyq túrde júrgizildi.

«Aqtóbe balalar aýrýhanasyndaǵy kardıohırýrgııa ortalyǵy 2009 jyldan beri jumys istep tur. Onda 3 kardıohırýrg jumys isteıdi. Bilikti hırýrgterdiń kómegimen týa bitti júregi aýyratyn, tipti shala týǵan balalarǵa da ota jasalyp jatyr. Al búgin Ulttyq ǵylymı medıtsına ortalyǵynyń mamandary 70 balany qarap shyqty. Onyń 10-yna ota jasaý úshin Nur-Sultan qalasyna joldama berildi», - dedi oblystyq balalar aýrýhanasy bas dárigeriniń orynbasary Saǵıdolla Dosmaǵanbetov.

Aıta keteıik, aqtóbelik balalardyń júrek aqaýyn qaraýǵa Ulttyq medıtsınalyq ortalyqtan kardıohırýrg Danııar Qanjynalın men ÝDZ dárigeri Anar Sersembaeva keldi. Aldaǵy ýaqytta naýqas balalarǵa joldamamen ortalyqta ota jasalady.

«Júrek aýrýynyń da túri kóp. Eger balanyń jaǵdaıy qıyn, ómirine qaýip tónip tursa birden ota jasalady nemese sanavıatsııa arqyly Nur – Sultan qalasynan kómek alamyz. Bárine birden ota jasalmaıdy. Máselen, júrektegi sańylaý bala óse kele bitip ketetin jaǵdaılar kezdesedi. Bul jaqsy. Eger baqylaýdaǵy bala sýyq tıip aýyryp, júregindegi dert dendep, demikse, dereý otaǵa jiberiledi», - Saǵıdolla Dosmaǵanbetov.