Jańalyqtar  >
Aqtóbede jol apatynan júrgizýshi men 10 jastaǵy bala kóz jumdy
2022 jylǵy 16 tamyz 22:50

Aqtóbede jol apatynan júrgizýshi men 10 jastaǵy bala kóz jumdy

AQTÓBE. QazAqparat – Aqtóbe oblysy Temir aýdanynda taǵy da jol apaty boldy. Júrgizýshi men 10 jastaǵy bala kóz jumyp, úsheýi aýrýhanaǵa tústi, dep habarlaıdy QazAqparat tilshisi.

Oqıǵa búgin saǵat 17:00-de «Aqtóbe-Bolgarka-Shubarqudyq» tas jolynda tirkeldi. GAZel avtokóliginiń júrgizýshisi Aqtóbe qalasy baǵytyndaǵy jolda qarsy jolaqqa shyǵyp ketip, Temir aýdanyna bara jatqan «Toyota Camry» avtokóligimen soqtyǵysqan.

«Jol-kólik oqıǵasy saldarynan «Toyota Camry» avtokóliginiń júrgizýshisi oqıǵa ornynda qaza tapty. Sonymen birge 4 jolaýshy Temir aýdandyq ortalyq aýrýhanasyna jatqyzyldy. Qazirgi kezde Qylmystyq kodekstiń 345-baby 3-tarmaǵy boıynsha sotqa deıingi tergeý amaldary júrgizilip jatyr», - dedi oblystyq PD baspasóz qyzmeti.
Aqtóbe oblystyq densaýlyq saqtaý basqarmasynyń basshysy Rústem Isaevtyń aıtýynsha, aýrýhanaǵa túsken 10 jastaǵy bala esin jımastan kóz jumdy. Ol bas-mı jaraqatyn alǵan. Ózge úsh naýqas ta bas-mı jaraqatyn alǵan. Aýdan dárigerleri sanavıatsııa shaqyrdy.
Eske salsaq, Pokrovka – Jańajol avtojolynyń 75-shaqyrymynda bolǵan jol apaty saldarynan tórt adam mert boldy. Temir qalasynan Keńqııaq aýyly baǵytynda kele jatqan VAZ-2113 avtokóliginiń 26 jastaǵy júrgizýshisi qarsy qozǵalysqa arnalǵan jolaqqa shyǵyp ketip, Muǵaljar aýdanynyń 50 jastaǵy turǵynynyń basqarýyndaǵy KamAZ kóligimen soqtyǵysqan. Jol-kólik oqıǵasy saldarynan VAZ-2113 avtokóliginiń júrgizýshisi men úsh jolaýshysy alǵan jaraqattarynan oqıǵa ornynda kóz jumdy. Sonymen qatar jeńil avtokóliktiń taǵy bir jolaýshysy Keńqııaq aýylynyń aýrýhanasyna jatqyzyldy. Atalǵan fakti boıynsha da QR QK-niń 345-baby 4-bóligi boıynsha sotqa deıingi tergeý bastaldy.

Foto: polisia.kz


Uqsas jańalyqtar
Seriktester jańalyqtary

Jańalyqtar

Úrdis

MURAǴAT