Aqtóbede jergilikti bıýdjet esebinen 87 bilim granty bólinedi
2022 jylǵy 1 shilde 21:53

Aqtóbede jergilikti bıýdjet esebinen 87 bilim granty bólinedi

AQTÓBE. QazAqparat – Aqtóbede bıyl 87 bilim granty bólinedi. Kadr tapshylyǵy seziletin salalarǵa basymdyq berilmek, dep habarlaıdy QazAqparat tilshisi.

Bilim granttaryn bólý jónindegi komıssııa otyrysyna oblys ákimi Ońdasyn Orazalın, memlekettik organdardyń basshylary qatysty. Bıyl jergilikti bıýdjet esebinen barlyǵy 87 bilim granty bólinedi.

«Oblysta 210 muǵalim jetispeıdi. Osyǵan oraı, matematıka, fızıka, hımııa, aǵylshyn jáne orys tili páni muǵalimderin daıarlaýǵa 35 grant bólý týraly sheshim qabyldandy. Taǵy 20 grant dárigerlerdi oqytýǵa bólinedi. Sondaı-aq, oblystyq bıýdjet esebinen qurylys, energetıka, aýyl sharýashylyǵy jáne t.b sala mamandary oqytylady. Mamandyqtar tizimi oblystyq bilim basqarmasynyń áleýmettik jelilerdegi resmı paraqshalarynda jarııalanady. Baıqaýǵa qatysý úshin qujattardy qabyldaý 15 tamyzǵa deıin jalǵasady», - dedi oblystyq bilim basqarmasynyń basshysy Joldas Batyrhan.

Oblys ákimi qolǵa dıplom alǵan kezde qoıylatyn talapty jan-jaqty túsindirýge tapsyrma berdi.

«Joǵary oqý ornyn bitirgen árbir maman oblystaǵy kadr tapshylyǵy bar kez kelgen eldi mekenge baryp, keminde 5 jyl kelisimshartpen jumys isteýge mindetti. Sol sebepti aqsha bólip, suranysqa ıe mamandyqtarǵa oqytyp jatyrmyz», - dedi oblys ákimi Ońdasyn Orazalın.

Aqtóbede oblystyq bıýdjet esebinen bilim granttaryn taǵaıyndaý baıqaýy alǵash ret 2018 jyly ótti. Qazir 15 joǵary oqý ornynda 251 stýdent bilim alyp júr. 2021 jyly 17 aqtóbelik rezıdentýrany aıaqtasa, bıyl 25 bakalavr jáne 21 rezıdent bitiredi. Oblystyq bilim basqarmasynyń habarlaýynsha, bıyl doplom alǵan 46 jas mamannyń jumys orny anyqtaldy.


Uqsas jańalyqtar

Jańalyqtar

Úrdis

MURAǴAT