Aqtóbede sýǵa túsýge qaýipti 220 oryn anyqtaldy
2022 jylǵy 26 mamyr 23:31

Aqtóbede sýǵa túsýge qaýipti 220 oryn anyqtaldy

AQTÓBE. QazAqparat – Aqtóbe ózenderindegi qaýipti 220 orynǵa arnaıy belgi ornatylady. Al kásipkerler jaǵajaı ashýǵa ótinish berip, qazir ózen túbin tazartý jumystary júrip jatyr, dep habarlaıdy QazAqparat tilshisi.

Aqtóbede sýǵa túsý maýsymy 1-maýsym kúni bastalady. Aqtóbe qalasy boıynsha barlyǵy 18 jaǵajaı ashylsa, onyń bireýi kommýnaldyq bolady.

«Qutqarý jasaǵy bazasynda 88 qutqarýshy erikti oqytyldy. Olarǵa arnaıy sertıfıkat berildi. Olar jaz boıy ózen jaǵasynda qaýipsizdikti qadaǵalaıdy. Sonymen birge jyl saıyn oblystyq dene shynyqtyrý jáne sport basqarmasymen birlesip balalardy júzýge úıretý, qutqarý tásilderine mashyqtandyrý qolǵa alynǵan. Barlyǵy 20 basseınde 1200 bala sýda júzýdi meńgerdi», - dedi oblystyq TJD bastyǵynyń orynbasary Qaırat Qasym.

Aqtóbe oblystyq tótenshe jaǵdaılar departamenti, oblystyq Polıtsııa departamenti men eriktiler jaz boıy jumys isteıdi. Olar qaýipti dep sheshim shyǵarylǵan 220 oryndy erekshe baqylaýǵa almaq.

«Bul qaýipti aýmaqtyń bári belgilenip, arnaıy eskertý taqtaıshalary ornatylady. Keıin 2gis kartasyna engiziledi. Sonda kez kelgen adam qarap, ózine aqparat ala alady. Onda jaǵajaılar týraly da aqparat saqtalady», - dedi Qaırat Qasym.

Aıta keteıik, byltyr oblysta 5 jáne 6 jastaǵy eki bala sýǵa batyp ketti. Oqıǵa 2021 jyldyń 12-mamyry kúni tirkeldi. Qutqarýshylar jetkenshe sol jerdegi adamdar 2015 jyly týǵan balanyń denesin jaǵaǵa alyp shyqqan. Oqıǵa ornyna jetken súńgýirler 2014 jyly týǵan balanyń denesin jaǵadan 3 metr qashyqtyqtan, 7 metr tereńdikten tapty. Eki bala da sýǵa sheshinip túsken. Sýǵa batyp ketkender bir otbasynyń balalary emes.


Jańalyqtar

MURAǴAT