Aqtóbede polıtsııa kýáligin satýshy ustaldy

2022 jylǵy 28 qarasha, 14:14
Aqtóbede polıtsııa kýáligin satýshy ustaldy

AQTÓBE. QazAqparat - Aqtóbede «polıtsııa» kýáligin satýshy ustaldy, dep habarlaıdy QazAqparat Polisia.kz-ke silteme jasap.

ІІM Ózindik qaýipsizdik qyzmetiniń mindetteriniń biri qyzmetkerlerge qatysty, sondaı-aq vedomstvonyń bedelin túsiretin qylmystardy anyqtaý jáne jolyn kesý bolyp tabylady. Máselen, Aqtóbe qalasynda oblystyq polıtsııa departamentiniń ózindik qaýipsizdik basqarmasy mamandary ishki ister organdary qyzmetkerleriniń jalǵan qyzmettik kýálikterin daıyndaý jáne satý boıynsha qylmystyq áreketin toqtatty.

Anyqtalǵandaı, jergilikti turǵyn kompıýterdiń, túrli-tústi prınterdiń jáne lamınatordyń kómegimen jalǵan polıtsııa kýálikterin jasap, qarapaıym azamattarǵa satqan. Onyń páterin tintý kezinde keńse jabdyqtarynan basqa ІІM qyzmetkerleriniń kýálikterine arnalǵan júzden astam muqaba alyndy. Kúdikti jedel ýákildiń «korochkasyn» satqannan keıin arnaıy is-sharalardy ótkizý kezinde ustaldy.

Qylmystyq is qozǵaldy, kúdikti jasap, satyp úlgergen jalǵan qyzmettik kýálikterdi anyqtaý jáne tárkileý boıynsha sharalar qabyldanýda.


Foto: polisia.kz

Uqsas jańalyqtar
Seriktester jańalyqtary

Jańalyqtar