Aqtóbede kólikterdiń qar qursaýynda qalýyna jol tazalaýshylar kináli

AQTÓBE. QazAqparat - «QazAvtoJol» kompanııasy qar jaýǵan kezde joldy ýaqytyly tazalap úlgermedi. Sebebi tehnıkasy eskirgen. Aqtóbe oblystyq tótenshe jaǵdaılar departamentiniń basshysy Baýyrjan Syzdyqov oblys ákimdiginde ótken jıynda osylaı málim etti, dep habarlaıdy QazAqparat tilshisi.

Jıynda qysta óńirdegi joldardy kútip ustaý máselesi talqylandy. Oblystyq tótenshe jaǵdaılar departamentiniń basshysy Baýyrjan Syzdyqovtyń aıtýynsha, 3 qarasha kúni «Samara-Shymkent» tasjolynyń Qarabutaq aýylynan Qyzylorda shekarasyna deıingi aýmaǵy jabyldy. Al 4 qarashada Yrǵyzdan Qalybaı aýylyna deıingi jolda 196 kólik, sonyń ishinde Tájikstannyń 16 azamaty mingen avtobýs boldy. 8 turaqty jylytý beketi ashylyp, onyń altaýyna 212 adam evakýatsııalanǵan. 4 kún ishinde qar qursaýynan 230 adam, onyń ishinde 38 bala evakýatsııalanyp, ystyq tamaqpen qamtamasyz etilgen.

«Oblystyq mańyzy bar joldardy kútip ustaý mindetin moınyna alǵan «QazAvtoJol« merdiger kompanııasynyń tehnıkalyq múmkindigi jetpeıdi. Mekemede qazir 79 tehnıka bar, kóbi tozyǵy jetken. Negizi normatıv boıynsha 146 tehnıka bolýy qajet», -dedi Baýyrjan Syzdyqov. Oblys ákimi jaǵdaıdyń aldyn almaı, júzdegen adamnyń qar qursaýynda qalýyna jol bergen jaýapty mamandarǵa qatań eskertý jasady. «Jaýapty mekeme basshylary men aýdan ákimderiniń jaz boıy nemen aınalysqany belgisiz. Alǵashqy jaýǵan qarda-aq daıyndyqtaryńnyń qandaı deńgeıde ekenin kórsettińder. Onymen qosa qar qursaýynda qalǵan azamattar men balalarǵa barlyq kómek keshiktirilgen», - dedi oblys ákimi Ońdasyn Orazalın. Aımaq basshysy «QazAvtoJol» JShS-nyń basshysy Erbolat Ámirbekovke bir apta ishinde tehnıka sanyn arttyrýdy tapsyrdy. Endi tehnıka eń bolmaǵanda jalǵa alynady. Eske salsaq, 3 qarasha kúni saǵat 18:33-te «Samara – Shymkent» tasjolynyń 1 153-1 240 shaqyrymy aralyǵynda kólikterdiń qar qursaýynda qalǵany habarlandy. Habarlama berilgenimen kóbi jolǵa daıyndyqsyz shyqqan ári qysqa arnalǵan dóńgelegi salynbaǵan.