Aqtóbede kólik apatynan bir otbasynyń eki adamy aýyr jaralanyp, ekeýi mert boldy
2022 jylǵy 20 mamyr 13:00

Aqtóbede kólik apatynan bir otbasynyń eki adamy aýyr jaralanyp, ekeýi mert boldy

AQTÓBE. QazAqparat – Aqtóbe-Atyraý tasjolynda jol-kólik apaty bolyp, áıel adam men onyń qyzy kóz jumdy, dep habarlaıdy QazAqparat tilshisi.

Oqıǵa búgin saǵat 00:10-da Aqtóbe-Atyraý tasjolynda boldy. Baıǵanın aýdanynyń 40 jastaǵy turǵyny otbasymen birge «Renault Duster» avtokóligimen jolǵa shyqqan. «Aqtóbe–Astrahan» tas jolynyń 248 shaqyrymynda, ıaǵnı, Qaraýylkeldi aýylynan 1 shaqyrym jerde olar jol jıeginde turǵan «Iveco» júk kóligine soǵylǵan.

«Keıin «Renault Duster» avtokóligi jol jıeginde turǵan ekinshi «KamAZ» júk kóligine baryp soqtyǵysqan. Jol-kólik oqıǵasy saldarynan júrgizýshiniń 41 jastaǵy áıeli men 3 jasar qyzy oqıǵa ornynda kóz jumdy. Otaǵasy jáne onyń 2005 jyly týǵan uly Baıǵanın aýdandyq aýrýhanasynyń jansaqtaý bólimine jatqyzyldy», - dep habarlady oblystyq PD baspasóz qyzmetiniń jetekshisi Erbolat Sarqulov.

Qazirgi kezde Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sotqa deıingi tergeý amaldary júrip jatyr. Aqtóbe oblystyq PD barlyq kólik júrgizýshilerin jol qozǵalysy erejesin saqtaýdy suraıdy.


Jańalyqtar

MURAǴAT